Kyntait ba pynphriang khubor ka RSS

Shillong 15 Jymmang:
U President ka BJP Meghalaya u Bah Shibun Lyngdoh u la kyntait ba leh ka RSS ban pynmih ia ki khubor pyniapher niam bad pyniapher jaitbynriew kumba la sam kot lyng kdop ha kine ki sngi ha Garo Hills.
Haba iakren bad u Bah Shibun mynta ka sngi, u la ong ba ka jing pynphriang khubor sniew ka dei ka jingleh jong ki riew shim kabu kiba kwah ban pynsngew thuh bakla ia ki briew ka Garo Hills ban jop ia ka elekshon da ka lynti bym dei hynrei ki paidbah kim dei ban sngewthuh bakla.
“Kiba leh ki dei ki riew shim kabu kiba kwah ban jop kita ki briew ba ki kwah”, la ong u Bah Shibun.
U Bah Shibun u la ong ba ka seng ka la dep ujor ia kane sha u Chief Electoral Officer (CEO) halor kane ka bynta ban dawa ba u dei ban tohkit bad ban pynshitom ia ki briew ba donkti katkum ki kyndon jong ka ain.
Ka jingujor jong ka BJP ka long shi sngi shwa ban wan ka sngi ia thep vote ia ka elekshon MP shiteng samoi kaban long lashai ka sngi na ka bynta ka Tura Lok Sabha.
Ka BJP kam shym la pynieng kyrtong ha kane ka kynti hynrei ka la ai ia ka jingkyrshan ba pura ia u kyrtong ka NPP u Conrad K Sangma uban iakhun pyrshah para marwei  bad ka kyrtong ka Congress, kaba dei ka lok jong u Myntri Rangbah ka jylla u Mukul Sangma, ka Dikkanchi Shira.