Kyntait ba pynieng kyrtong pyrshah ia u Dr RC Laloo

Shillong, 17 Jymmang:
U Myntri sorkar jylla uba dei ruh u nongialam ka Congress, u Bah Sniawbhalang Dhar mynta ka sngi u la kyntait ba u la don bynta ban pynieng kyrtong na Jowai pyrshah ia u MLA ba mynta u Dr Roytre Christopher Laloo.
Ha ka jingiakren bad ki nongthoh khubor mynta ka sngi ha Shillong, u bah Sniawbhalang u la ong ba kumno ka Block Congress Jowai, kan shu kynnoh ia u, haba tang ia u kandidet jong ka party ruh ym pat pynbna.
“Ia u (Bah Wailad Shylla), uba dei u kynum jong nga, la jied da ka shnong Mukhla, ngam dei uba phah ban iakhun elekshon”, la ong u Bah Sniawbhalang bad bynrap, “ka dei ka hok jong uno uno u briew ban pan tiket hynrei kan shong ha ka party ban rai”.
Katkum ka jingong u Bah Sniawbhalang, lada u pynieng kandidet hadien ba ka party ka la pynbna ia u kyrtong, lah ban ong ba u la ialeh pyrshah ia ka party. Mynta mano mano ki lah ban pan tiket na ka party bad ka shong ha ka party ba kan rai iano ban ai tiket.
“Peit kum ha Umroi konstitwensi ha ka elekshon MLA ba la dep, ia u MLA u Bah Stanlywis Rymbai ruh ka party ka la pynduh tiket namar ba ka kwah ia u briew ban jop beit ha ka elekshon”, la bynrap u Bah Sniawbhalang.
Kane ka jingpynshai u Bah Sniawbahlang ka long hadien ba ka Jowai Block Congress Committee ka la kynnoh ba u la pyrshang ban ialap ha ki paidbah ban ai tiket noh ha u Bah Wailad Shylla uba dei u kynum jong u, bad ban pynduh tiket noh ia u Dr RC Laloo.
Ka Jowai Block Congress ka la ujor sha ka MPCC pyrshah ia u Bah Sniawbhalang, da kaba dawa ruh na ka Meghalaya Pradesh Congress Committee ba kan pynshitom ia u bad ban pynhap shuki noh kum u Myntri.
U Bah Sniawbhalang u la ong ba u Bah Wailad Shylla u dei u nongtrei party la 8-9 snem uba shitrhem bha bad un sa pan tiket na ka party ha kane ka kynti ban iakhun na Jowai tangba ia kane, yn shong ha ka rai jong ka party. U Bah Sniawbhalang u la shah kynnoh ha ka Jowai Congress ba u la leit ban ialap elekshon sha kylleng ki jaka ban kyrshan ia u Bah Wailad da kaba pyrshah ia u Dr RC Laloo.
Ha kawei ka liang u Bah Sniawbhalang u la kyntait ia ka jingmih khubor ba un mih noh na ka seng Congress ban leit sha kiwei pat ki party kum ka NPP. U la pynthikna da kaba ong, “Ha kane ka elekshon ban wan, un iakhun beit na ka party Congress bad ka jingkynnoh ba un mih noh ka dei tang ka khubor lamler”.
Hynrei ha kajuh ka por, u la ong ba, u burom ia baroh ki party, hynrei ban leit pyniasoh sha kawei ka pat ka party kam jingmut namar ba u la rai ban iakhun beit na ka Congress.