Kyntait ain shongwai Tympang

Shillong,9 Nohprah:
Ka Dorbar Dong Tympang Iawmusiang ha ka Kyrwoh ba la phah da u General Secretary jong ka Dong Tympang Iawmusiang Jowai ma A. Lywait ka la ong ba ka Executive Committee jong ka Dong Tympang Iawmusiang Jowai kaba la long ha kane 29 tarik u bnai ba la lah , ka Dorbar ka la rai ban ym pdiang ia ka ” Meghalaya Regulation of Landlords and Verification of Tenants Bill 2013 da kaba ong ba katei ka Bill ka kren tang shaphang u trai iing nongaiwai bad ia u nongshongwai.
Shuh shuh ka kyrwoh ka ong ba kane ka Bill ka khlem batai iano yn khot u Mynder lane u ei u Mynder bad kam don ruh ka jingteh ia ki Mynder ban wan shapoh u pud u sam ka jylla. Nangta la ong ruh ba hadien ba ka Executive Committee ka la shongpyrkhat bha la shem ba kane ka Bill kam iahap satia bad ka jingkwah jong ki paidbah bad ki seng bhalang ki dawa bad pyrta na ka por sha ka por. La ong ruh ba ka Executive Committee jong ka Dong Tympang Iawmusiang, Jowai kam lah ban pdiang ia kane ka Bill namar kiba bun ki mat ba kane ka Bill kim long kiba shai bad kaba ai jingiada ia ki trai muluk trai jaka kiba ai wai iing ia ki nongshongwai khamtam ia ki Mynder.