Kyntait ai jingtip, u heh JHADC

Jowai, 20 Iaiong:
U Chief Forest Officer ka JHADC uba dei ruh u Public Information officer jong katei ka tnad ha JHADC u la kyntait ban ai ia ka jubab lyngba ka RTI Act kaba la pan da u President ka JYF u ma Poipynhun Majaw.
Nalor ba utei u Officer ka JHADC u la kyntait ban ai ia ka jubab, u la pynslem ruh ban ai jubab haduh 57 sngi ha ka jaka 30 sngi katkum ka RTI Act 2005.
U President ka JYF u pan jingtip lyngba ka RTI na katei ka tnad halor ka jingiohlum khajna bad ka rukom pyndonkam ia ka pisa kaba la ioh lum da katei ka tnad naduh ka 22 tarik Rymphang 2016 bad u Chief Forest Officer u la ai ia ka jubab kaba tang ar lain  ha ka 18 tarik Iaiong 2016.
Utei u Officer u la ong ba ym lah ban ai ia ka ka jingtip halor ka kyndon Section 7(1) jong ka RTI Act 2005.
Ha ka jingshisha katei ka Section 7(1) kam shym la kdew satia eiei ruh ba u lah ban kyntait ban ai ia ka jubab kaba la pan lyngba ka RTI Act.
Na ka liang ka JYF ka la pynpaw iaka jinglyngngoh ban iohi ia katei ka jingleh jong utei u Officer.
“Hato katei ka jingleh khnang ban buhrieh ia ki jingshisha ne ka jingbym nang jong u ia ki kyndon jong ka RTI Act”, la ong u President ka JYF.
“Nga ngeit ba kane kadei ka jingleh khnang jong utei u saheh ka JHADC ban lait na ka jingshah thad madan halor ka jingpynkam bakla ia ka pisa paidbah lyngba ka tnad Forest ka JHADC”, u Majaw u la bynrap.
Utei u nongialam ka JYF, u la ong ruh ba un leit ban ujor pyrshah ia kane sha u Chief Information Officer (CIC) ka jylla halor kane ka jingkyntait jong utei u Officer ka JHADC ban ai jingtip khlem da kdew shai ia ki daw kiba biang.