Kynsan kynsan pynsangeh ia ka eksamin kiew kyrdan ki Home Guard

Shillong, 22 Nailur:
Ki tyllong khu bor kiba u Rupang u la ioh lum la iathuh ba ka sorkar ka la pynsangeh kynsan kynsan ia ka eksamin pynkiew kyrdan ia ki pulit Home Guard khlem da pynshai ia ka daw. La iathuh ba la buh tarik ban pynlong ia katei ka eksamin na ka bynta ban pynkiew kyrdan ia ki pulit langrut ka Home Guard sha ka kyrdan Havildar Clerk bad ia ka tarik la buh ha ka 19 u nailur kaba dei ka sngi saitjaiñ. La iathuh ba la buh ba katei ka eksamin kan sdang naduh ka por 10 baje mynstep ha ktem bah ka Home Guard kaba don ha Mawdiangdiang, hynrei ki tyllong khubor ki la ong ba la pynsangeh kynsan kynsan ia katei ka eksamin ha katei hi ka step.
Shuh shuh la ong ba katei ka jingpynsangeh ka la pynkyndit ia baroh ki pulit Home Guard kiba la pynkhreh ban ia khun ha katei ka eksamin namar ba wat ia ki Roll Nombar ruh la pynbit pynbiang lut ha ka Hall ban thoh eksamin bad la ong ba baroh ki pulit langrut ki la poi lut sha katei ka jaka ban ia khun ha ka eksamin hynrei ki la lyngngoh ba kynsan kynsan la mih ka jingpynbna kaba la wah ha notis board ba la pynsangeh noh ia katei ka eksamin khlem da pyni ia ka daw. Ki tyllong khubor kiba u Rupang u la ioh lum la ong ba ki don kumba 90 ngut tam ki pulit langrut ka home Guard kiba la aplai ia katei ka kam Havildar Clerk katba ka kam kaba lait pat ka long 12 tylli.
Katkum ka jingiathuh ki lad khubor ki la ong ba mynshuwa haba donkam ban kyntiew kyrdan ia ki pulit ka Home Guard ki ju don ki por ba la phah Training ia ki bad la jied ia kiba lah bha ha ka Training katkum ka jingdon jong ki kam kiba lait, bad la ong ruh ba ki ju don ki khep ba la khot ia kito kiba la lah ban trei ia katei ka kam bad la ju pynieng laiñ ia ki ha kaba ki bor bahalor ki jied ia kiba bit tam ban rung ha katei ka jingpynkiew kyrdan. La ong ba ka jingpynthoh eksamin ruh ka dei kawei na ki kyndon pynkiew kyrdan kaba don ha katei ka tnad kumba la thmu ban leh ha kane ka kynti kaba mynta. Ki tyllong khubor ki la iathuh ba ki pulit langrut kiba lah ban ia khun ha katei ka eksamin ki dei kiba la pass ia ka matrik shajrong.
Halor katei ka jingpynsangeh kynsan ia ka eksamin pynkiew kyrdan ia ki pulit langrut ka home Guard u Rupang u la ioh jingtip lyngba ki tyllong khubor ba ka dei hadien ba la poi ka jingujor na ri Lum Garo, hynrei haduh mynta ym pat lah ban pynthikna ia katei ka jingujor. Namar katei ka jingpynsangeh kynsan kaba la wan na ka sorkar ki la mih ki jingkynnoh na ki katto katne ngut ki pulit langrut jong ka Home Guard ioh ba ka don kano kano ka jingthmu ban ia leh tuh leh thok halor katei ka kam ne ioh ba ka don ka jingthmu ban ia die ia thied ia katei ka jingpynkiew kyrdan, haduh mynta u Rupang um pat ioh jingshai ia ka jingpynsangeh kynsan ia katei ka eksamin pynkiew kyrdan bad ka jingkylli kaba mih mynta ka long hato don eiei sha lyndet halor katei ka jingpynsangeh kynsan ha katei hi ka step ia ka eksamin kaba la dep pynkhreh nadong shadong?.