Kynriah noh ki thied snam, naba sniew surok palat, ong ki paidbah ha Ribhoi

Shillong:Ka jingwan jong ka surok two lane ha ki thain Ribhoi District ka la long ka jingkyrkhu, kaba khraw ia baroh ki nongleit nongwan kiba iaid lyngba ia ka ne ka surok namar ba ka kylluid bad ka la iarap shibun ia ki nongleit nongwan ba kin poi kloi ha ki kam ki jam, ia ka Surok bah (Highway) ha ka jylla la pyntrei da ka National Highway Authority of India (NHAI) bad ka HHAI ka ju shim ruh ia ka pisa na ki briew ki ba leit ba wan na ka bynta ban pynbha ia kane ka surok.

Hynrei haba kane ka bor ba dei peit ia ki surok bah ki leh kyllut bad leh mat lah ha ka ba ia dei ban pynbha ia kine ki surok bah ka wan rah jingeh ia ki nongleit nongwan kiba hap ban iaid lyngba kane ka jaka.
“Wat ki thied snam ruh ki la kynriah lut haba iaid lyngba kane ka surok naba sniew eh ka surok” kane ka long ka sur jong ki katto katne ki nongshong kali kiba jubab ia ka jingkylli jong ki lad pathai khubor halor ka jingsngew jong ki, ia ka jingsniew ka surok kali ha syndah ka jingkieng Umtrew, Ri-Bhoi district.

Katei ka jingsniew ka surok kali bad ka jingpynslem jong ka NHAI ban maramot ia kane ka surok ka la mih ruh ka jingkynnoh ba ka dei ka jingbym shimkhia da ka tnat National Highway Authority of India (NHAI) ban maramot ia ka surok kali, kaba la wanrah ia ka pang met pang phad jong ki nongshong kali bad ka jingud ia ka jingktah sha ki nongñiah kali ba iaid ba ieng man la ka sngi ha katei ka jaka.

Haba ia kren bad ki katto katne kiba iaid ba ieng da ki kali ha katei ka jaka bad kumjuh na ki nongshong kali ki ba la dawa na ka NHAI ba kam dei ban lap miet tang ba kan lum khajna ban kamai pisa lyngba ka khyrdop lum pisa (Toll Gate) ka ba don ha 20 Mer bad kiwei kiwei ki jaka, katba ia ka kam ban maramot ia ka shilynter jong ki surok kam lah satia ban leh eiei.
Ki nongñiah kali ki la ud ruh ba ki kali jong ki, tang mar ia poi ha katei ka jaka ki la hap iaid suki bad ktah ruh ia ka jingbha ka kali ba ki ñiah bad wat kiba shong kali ruh ki la mad ia ka pang met, haba la kynriah sa ki thied snam jong ka met jong ki, na katei ka jingsniew ka surok.