Kynriah bishar ka High Court ia ka mukotduma ka HYC bad Bah Adelbert

Shillong, 04 Nailar:
Ka High Court ka Meghalaya mynta ka sngi ka la pynkynriah noh ia ka sngi bishar ia ka mukotduma jong u Bah Adelbert Nongrum bad ka HYC sha ka 7 tarik Nailur ban wan.
Ka jingbishar mynta ka sngi, ka la Kashari ka la ong ba ki san ngut ki nongialam ka HYC bad u Bah Adelbert Nongrum ki dei ban siew mar T. 5000 sha ka Meghalaya State Legal Services Authority (MSLSA) kumba la pynmih ia ka hukum kham mynshwa ha ka 19 tarik Naitung 2016.
Ha ka hukum ka Kashari ka la ong ba la pynkynriah ia kane ka jingbishar da kaba pynngat ia ka kuna kaba mar T. 5,000 ia ki ba kin siew sha ka Meghalaya State Legal Services Authority, Shillong bad ba kin ai ia ka affidavit hapoh ar taiew naduh mynta ka sngi.
Ka donkam ia u Bah Adelbert Nongrum ban iasaid da u Bah H.S. Thangkhiew, bad ruh ia ki san ngut ki dkhot ka Central Executive Committee (CEC), ka Hynniewtrep Youth Council (HYC) namely, (1) Bah Robert June Kharjahrin, General Secretary; (2) Bah Nickson Dohling, Organizing Secretary; (3) Bah Donboklang Kharlyngdoh, Vice President; (4) Bah Anthony Kharbuli, Adviser bad (5) u Bah Issac
Basawiamoit, Asst. Organizing Secretary, ba la mihkhmat da u K Paul, ba ki dei ban wan mih dalade ha ka sngi ban shim bishar biang, la ong ka Kashari.
Ka Kashari ka la maham ruh ba ki lad pathai khubor, ba ki dei ban tyngkan kumba la pynmih hukum mynshwa.
Ha kajuh ka por, ka Kashari ka la ong ba kine ki san ngut ki dkhot ka HYC ki la dep thep ia ka affidavit bad ia ka kopi jong ka affidavit la ai ruh sha u nongiasaid ka CBI.
Kine ki san ngut ki la thep da ka affidavit da kaba pan map khlem kano kano ka jingbuh kyndon halor katei ka jingjia, hynrei la ailad ia ki ban thep shuh ia ka affidavit bynrap hapoh ar taiew.
Mynta ka sngi, u Bah Adelbert Nongrum u la poi slem sha ka Kashari halor ka jingkynnoh ba sahkut kali katba ki san ngut ki dkhot ka HYC ki la poi biang por.