Kynran dien U Rophul, na ka lympung MP, un kyrshan ia ka Dikanchi

Shillong, 28 Iaiong:
Kan dei ka khubor jingkmen ia ka Dikanchi Shira, ka kurim jong U Mukul Sangma, haba U Rophul S Marak, u MLA shimet jong ka Rongara Siju, ula pynbna mynta ka sngi, ba un nym ialeh shuh ia ka elekshon MP 2016 na Tura Constituency.
Ha ka jingiakren bad U Rupang, da ka mobile, U Rophul, ula iathuh ba ula ia kynduh mynta ka sngi bad ki dkhot jong ka High Power Committee (HPC) ha ka Constituency bad ki la ai jingmut ia u, ba un nym ia khun satia mynta ka kynti bad haba la kylli biang, la un thep kyrteng ne em lashai ka sngi, ula ong “Em, ngan nym thep kyrteng satia” bad haba la kylli biang, la un kyrshan iano pat, ula ong “Dikanchi”.
Haba la kylli shuh shuh, la u myntri rangbah, ula pdiang ne em, ia ka shithi iehnoh kam jongu, kum U Parliamentary Secretery, U Rophul, ula ong “Ngam tip” bad haba la kylli biang, la un leit phai biang ne em sha katei ka shuki, kaba ula dep iehnoh ha ki khyndiat sngi ba ladep, ula ong “Ngan sa peit”.
U Rophul, ula hiar shuki kum U Parliamentary Secretery, ha ki khyndiat sngi ba ladep bad ula pynbna ruh, ba un ia khun ia ka elekshon MP, ha kane ka kynti, ha kaba ula pynpaw ruh, ba um sngew tynnad satia, ha ka jing ia trei kam jongu, ha kane ka sorkar jong U Mukul Sangma.