Kynran dien ka NPP, rai ban kyrshan ia ka UDP

Shillong: Ka NPP kaba ialam ia ka sorkar MDA ba la don lang ka UDP, ka la rai ban kynran dien na ka jingiakhun ha kane ka elekshon shiteng samoi na Shella kaban long ha ka 21 tarik Risaw ban wan.

Ha ka jingpyllait kyrwoh mynta ka sngi, ka NPP ka la pynbna ba ka la rai ban shu kyrshan ia ka UDP ha kane ka elekshon shiteng samoi na Shella.
“Ka jingialang ka State Executive ka NPP Meghalaya State Unit mynta ka sngi ka la rai ban nym pynieng kyrtong ha kane ka elekshon shiteng samoi na Shella Constituency”, la ong ka kyrwoh bad ka la bynrap, “Ka NPP Meghalaya State Unit kan kyrshan beit ia u bah Balajiedkupar Synrem u kyrtong ka UDP”.