Kynnoh U bah Erwin, ba ka don ka jingthmu ban die ia ki jaka khappud, ba T.20 hajar klur sha Assam

Shillong: U Bah Erwin Sutnga u Legal Adviser jong ka Congress, u la kynnoh ba na ka liang jong ka politician kiba don hapoh ka sorkar Jylla, mynta ki don ka jingthmu ban die ia ki jaka sha ka Assam ha ka ba kin sa siew T.20 hajar klur kin siew sha kine ki party na ka jingdie ia kine ki jaka sha ka Assam.

“ Ngam pat kwah ban ai bha ia ka jingtip, hynrei mynta ka don ka jingiapynbeit ia ka jingkhaii bad ka jingleh politic kaba heh bha halor kane ka jingiasam ia ki jaka, ki don ki briew kiba la pyntip ba bun na ki ne ki politician ki la don ka jingiateh ban die ia kine ki jaka sha ka Assam bad kin siew T20 klur sha ki party kiba don ha ka sorkar bad hadien ba ngi la ioh ia ki jingshisha baroh ngin sa pynpaw paidbah halor kane ka jingia die ia thied ia ki jaka jong ka jylla” la ong u bah Sutnga sha ki lad pathai khubor.

Mynta ka sngi ka Joint Action Committee (JAC) kaba kynthup ia ki Rangbah Shnong jong ki 6 shnong bad ki Sengbahlang na ka thain Ribhoi District ha ryngkat ka jingia synran lang bad ki dkhot jong ka Congress party mynta ka sngi ki la wan buh da dorkhas ha khmat u Myntri rangbah ban kyrpad ba un pynkut noh shwa ia ka jingiasoi MOU hapdeng ka jylla Assam bad Meghalaya.

Mynta ka sngi na ka liang u myntri rangbah u la kyntait ban ia kynduh ia kine ki kynhun na ka daw ba u bun ki jingialang bad namar ba ki khlem shim lypa ia ka por ban ia kynduh bad u, hynrei na ka liang kane ka kynhun ka la buh da ka dorkhas ban dawa na ka sorkar jylla ba kan pyndap noh shwa ia ka MOU ka ba ki la soi dang shen halor ka jingpynbeit ia u pud u sam jong ki 6 tylli ki jaka. U bah Erwin Sutnga u la ong ba ka jingdawa ban phah pyndam noh shwa ia kane ka jingiasoi ka long halor ia ki jaka ki gba la kam da ka jylla Assam hapoh ka kyndon ka ba don ha ka Schedule I jong ka Assam kaba ong ba ki ong ka Khasi State ki khlem shim ia kane bad la shu leh bad pynurlong jubor ia kane ka kam. U la ong ruh “Ka jingbym pdiang ia kane ka long ruh namar ba kawei ka long ba ka la dei ban don ka jingiasyllok bad ki District Council namar ba ka sorkar kam don hok ia ki jaka puta ha kano ka nongrim ba ka sorkar jylla ka shim rai ia ki khyndew ki syiap ki bym dei jong ki” . “Hato ka Sorkar kan lah ban phiah ia ka Autonomous District kaba ka jurisdiction ka don hapoh ka para 20 bad lada ka sorkar ka mut ban mushlia ia kane kan sa mih ka jingiakhih ka ba shyrkhei”u la ong. U la bynrap shuh shuh “Namar ba ki briew ki ba sah sha ki border ki sngewthuh bha ba kin ym lah ban ia im bad ki nong Assam, khamtam haba kam don ka jingshai halor ka jingai ia ki jaka”. “Lada ki ong ba tang ka pungdohkha, hynrei na ka liang jong ngi ngin ym ai tang shi inchi ruh ka jaka jong ngi ruh sha ka Assam namar ba ngi la wan ban pyniasoh bad ka Ri India kat kum ka Section 7 of Independent Act”la ong u bah Sutnga. U la ong ruh “Na ka liang jong ki, ki dawa ban pynsangeh noh ia kane ka MOU bad ki dei ban ia syllok shwa bad ka District Council bad ki nongsynshar shnong bad ki trai jaka halor ka bynta namar ba ka sorkar kam don hok eiei ia ki jaka ha ka jylla” . “Kam don jingeh eiei ban bishar biang ia ka MOU hynrei ka dei tang na ka bynta ban ioh ka jingmyntoi ha ka kam sainpyrthei jong ka sorkar MDA”u la bynrap . U bah Sutnga u la byrngem ruh “Lada ka sorkar MDA ka leh kyllut ia kane ka jingdawa jong ngi, ngin leit tied jingkhang ha ka Supreme Court halor kane ka bynta bad kane kan long kat kum ka article 131 kaba don ka course of Action halor kane ka bynta bad ngi kyrmen ba ka court kan ai ia ka stay order halor ka ne ka bynta” .