Kynnoh ki 6 seng bad RS ba leh donbor ka EC U Ma Rymbai

Ba phiah konstitwensi
Shillong,19 Naiwieng:
Ki 6 sengbhalang ba kynthup ia ka JPMF, JYF, JSU, HANM, HNPF, FKJGP bad ki Rangbah shnong bapher bapher ha Ri Lum Jaintia ki la pynpaw ia ka jingsngew pyrshah kaba jur ia ka jingphiah Konstitwensi ka JHADC kaba la leh da ka EC jong u Ma M.B Rymbai. Ki la kynnoh ba katei ka jingphiah konstitwensi ha JHADC ka dei ka jingleh donbor jong ka EC u Ma rymbai kaba la pynkhein ruh ia ka ain 1961, Article 244 jong ka Riti synshar ka ri India kumjuh ia rule jong ka Meghalaya Autonomous District Council 1951. Ki la kynnoh ruh ba la phiah jubor hapdeng ka jingpyrshah kaba bun na u paidbah ha ka Public Hearing kaba la long ha ka 23 bad 24 tarik u Risaw.
Ki 6 seng ryngkat bad ki Rangbah shnong ki la ong ba ka jingphiah konstitwensi ka JHADC ka dei kaba la shu leh kyrkieh ha kaba wat ki para MDC ruh kim ioh lad ban ia kren ia phylliew jingmut lang ,kumjuh ruh kam shym la don kano kano ka jingiakren ne ka jingpan jingmut na ki riew pawkhmat kum ki Dalloi, Rangbah Shnong, Sengbhalang bad kumjuh ki paidbah nongshong shnong ka District baroh kawei. Ki la ong ba katei ka jingphiah ka long ruh ka bym shym iaid ryntih kat kum ki jaka ba dei ban iaid, hynrei ka long kumba ia ryngkoh na kawei ka jaka sha ka wei pat, don ruh ki shnong kiba la pait arliang hapoh u juh u Rangbah Shnong. Ka jingheh ne jingbun paid na ka wei ka Constituency sha kawei pat kam shym ia ryngkat katba ka skhim MDC pat ka long mar katjuh. Ki la kynnoh ba kate ka jingleh ka JHADC ka dei tang ka jingpyniohnong ia ki katto katne ngut ki MDc ha kane ka elekshon ban wan.
Ki Sengbhalang bad ki Rangbah Shnong kila iawer ia ki paidbah bad ia kiwei pat ki Rangbah Shnong bad Sengbhalang ban iasnohkti lang ha kaba yn lah ban pynsangeh shwa ia kane ka jingthmu jong ka JHADC ha kane ka kynti.Ki la kyntu ruh ia ka sorkar jylla ba kam dei ban ailad ne shah ia ka jingthmu jong ka JHADC bah pynurlong ia ka jingthmu phiah Constituency jong ka. Ki la ong ba kin pynpaw ia ka jingpyrshah jong ki ia katei ka jingphiah konstitwensi da kaba kin iaid sha khmat sha ki bor jong ka ain. Ka la pyntip paidbah ba kito kiba kwah ban kyrshan ki dei ban ai jingtipda kaba shu phone ha ki nombar 8014973782 / 9615336251, ong ka kyrwoh na u Baitlang Pohsngap President ka JPMF bad ma Shaniah Suchen President HANM Jaintia Hils Unit.