Shillong: Ka seng ki samla pule ka North Eastern Hills University Students’ Union (NEHUSU) ka la kyntait ia ka jingkynnoh ba ki dkhot kila don kti ban thaw jingkulmar ha Tura Campus bad kawang maw ïa ka ïing sah ( quarter) jongu Pro Vice Chancellor (PVC) ka University u G Singhaiah kaba don ha Tura, West Garo Hills.
Haba pynshai bad kyntait halor kane ka jingjia, ka NEHSU ka la ong ba ka jingkynnoh ka dei kaba bakla bad ka bym lah ban pdiang.
“Lada kita ki nongbylla ki kam ba ngi la shoh ia ki, ki dei ban sei ki jingshisha ki medical report ban pynshisha ia kata. Ngi shim ia kane ka jingleh kynshlein ia ki kynthei ka dei ka kam kaba khia bha bad yn ujor ejahar ruh ia kine ki runar”, la ong ka seng.
Ha kajuh ka por, ka la kynnoh ba ha ka jingshisha, ki dkhot ka NEHUSU ki leit iaid ha ka por janmiet ha ka 7 tarik Iaiong ha ka por 1:30 pm eiei bad ha kane ka por, ka President ka NEHUSU ka samla Genuica Majaw ka la leit ban iaid ha campus bad ha kane ka por, ka la shah leh kynshlein pynban ha ki nongbylla kiba trei ha katei ka jaka bad halor kane, ka la iathuh sha ki dkhot ka seng, ha kaba ki la leit ban kren ia kine ki nongbylla ba kim dei ban leh khlem akor.
Ka NEHUSU ka la kam ruh ba ki dkhot ka seng ki la shah pynbor ban kam ba ki la kawang maw ha ki bor pyniaid ka Campus ha ka por janmiet por 6:pm eiei kiba la wan lymbung da kaba pyntieng ia ki dkhot ka seng ha kaba u Proctor ka NEHU Tura campus u la maham ia ki ba lada kim mih na Guest House por janmiet, kin sa shah hiar thma ha ki runar.
“Namar ka jingtieng, ki dkhot ka NEHUSU ki la kyrpad ia ka bor ba dei peit ka NEHU ban shah ia ki ban sah ha Guest House ha katei ka miet bad ngi la ong ba ngin mih noh lashai mynstep hynrei shwa ban mih na Guest House, u Proctor u la beh ia ki dkhot ka NEHUSU bad phah sah tang ia ka president marwei ka riew kynthei. Dei tad hadien ba ka la iam namar ka jingtieng, katto katne ki nonghikai kynthei kila tuklar bad kyrpad ia u Proctor bad u PRO VC Tura ban shah ia ki baroh ban sah ha katei ka miet”, la kam ka NEHSU ha ka kyrwoh.
Hynrei ha kajuh ka por, ki nongkitkam ka NEHUSU kila sngewsih haba u PRO VC ka NEHU Tura, u la wan sha Guest House bad kyntait ban ia khublei kti da kaba ong, “Ngam kwah ban ia khublei kti ia ki jait briew kum jong ma me” bad haba ki dkhot ka NEHUSU ki kylli, ka mut aiu ia kane ka jingkren jong u, u ong biang “Nga tip ia ki jait briew jong me” bad u phet noh, la kam ka NEHUSU ha ka kyrwoh.
Ha kajuh ka por, ka NEHUSU ka la kam ba kan ujor ejahar pyrshah ia u Proctor ka NEHU Tura na ka bynta ka jingpyntieng ia ki dkhot ka NEHUSU bad ruh pyrshah ia u Pro VC ka NEHU Tura uba la pynmih kyntien iapher jaitbynriew.
Ka NEHUSU ka pynrem ia ka jingkynnoh ba la leh da ka bor pyniaid ka Administration ka NEHU Tura Campus, pynkut ka kyrwoh na ka seng.
Ka NEHUSU ka sngew ba kum kane ka jingkynnoh pyrshah ia ki, ka dei ka jingthmu ban pynkbum ia ka sur jong ki samla pule kiba iakhun ia la ki hok jongki khamtam ia ki jingeh ba ki samla pule ha Tura Campus ki iakynduh. Ka la ong ba katkum ka jingtip jongki, ki don katto katne ki department kiba shim klas ia ki shynrang ha Boys Hostel bad kawei kaba sngew pang met ka long ba ki shynrang bad ki kynthei ki hap ban leit paiñkhana ha kajuh.
Ka la ong ruh ba ki samla pule ka NEHU Tura Campus ki hap ban iaid palat ia ka 20 kilometer haba donkam ban shon kot, thied khulom thied kot sada, xerox ne stationery. Ka la kam ba u Pro VC Tura ha u snem 2017 u la pynthikna ha ki nongialam ka NEHUSU bad ki samla pule ka Tura Campus ban shna noh ia ka dukan hynrei haba kylli ia kane, u Pro VC ka NEHU Tura u la kyntait ban don kano kano ka jingshna dukan na ka bynta kane ka jingthmu.
“Ka NEHUSU ka buh jingkylli ia u Pro VC ka NEHU Tura kumno kat ka skulbah kam don wat tang ia ki dukanstationery”, ka la ong.
Lah ban kdew ba ka la mih ka jingkynnoh pyrshah ïa ki dkhot ka North Eastern Hill University Student Union (NEHUSU) ba ki thaw jingkulmar ha Tura Campus bad kawang maw ïa ka ïing sah ( quarter) jongu Pro Vice Chancellor (PVC) ka University u G Singhaiah kaba don ha Tura hi, West Garo Hills.
La kynnoh ba ki dkhot ka NEHUSU kiba don kumba 9 ngut ei ei ki la shoh ruh ïa 7 ngut ki nongtrei bylla kiba trei hapoh ka phyllaw (Campus) jongka University. Kat kum ka jingïathuh ki bor pynïaid ka NEHU-Tura Campus, ïa kine ki 9 ngut ki dkhot ka NEHUSU la ai jaka sah ha Guest House jongka University hadien ba la wan pan bad kyrpad da u President ka Post Graduate Student Union (PGSU), NEHU, Tura Campus.
La ïathuh ba ki samla pule shynrang jongka Nokrek Boys ki pyntip sha u PVC halor kane ka jingjia. Haba u PVC u la wan phai u la ïakren bad kitei ki nongbylla ba la shah shoh bad mar mar u la pyntip ïa ka jingjia sha u SP ka West Garo Hills u Dr MGR Kumar.
Hadien kane ki pulit ki la wan poi ha katei ka Campus bad ïakren pynbeit ïa kane ka kam. Nalor kane la pynlong ruh ka jingïakynduh lang da ki nonghikai, ki dkhot ka PGSU bad rai ban phah mih noh ïa ki dkhot ka NEHUSU na katei ka Guest House. Halor kane ka jingjia ki bor na Tura Campus ki la rai ruh ban pyntip ïa kane ka jingjia sha ki bor ba halor ka NEHU.
Phi don ban ong eiei?