Ka nongtrei jong U Rajan Gogoi, Chief Justice of India, kaba dang 35 snem ka rta, ka la ujor pyrshah, ba ka ju shah leh jrong kti ha U Gogoi, hynrei, haba kam treh, kumta ka la shah beh kam noh ialade.
Ka jingshah beh kam jongka, ka dei halor ar tylli ki daw bad kawei na kitei, ka dei ba ka kwah ban kylla noh ia ka jaka shong jaka ha ka admin material section bad sa kawei pat ka dei ba ka pep trei shi sngi, na ka bynta ba ka leit sha ka prokram jong ka khun jongka hapoh skul.
Katei ka longkmie, ka sdang ban trei ha Supreme Court ha U Jymmang 2014, kum ka junior court assistant bad ha ka jing ujor jongka, ka la kynnoh ia ki 9ngut ki nongtrei jong ka Court kiba tip shaphang ki jingjia bad kitei ki kynthup ia u nongniah kali jong U CJI, uba leit on ia ka sha ka jaka ap rel bad nangta sa arngut ki marjan jongka, kiba iathuh shaphang ka jingwan wad ki pulit ia ka jaka sah jongka.
Ha ka jing ujor jongka, kaba 28 sla, ka la kynnoh ba ha ka 10 bad 11tarik Risaw 2018, U Chief Justice, ula ktah ieid ia ki bynta jong ka met jongka, haba ka don ha ka ophis jongu, kaba ha ka jaka sah jongu, hynrei haba kam shym la treh ban ialeh ieid, ka la shah kynriah kam da ki phew sien kynthih bad ha ka 21tarik Nohprah 2018, ka la shah weng kam, ha kaba la thaw ruh ia ka jing tohkit pyrshah ia ka.
Ka iathuh shuh shuh, ba ha ka janiet jong ka 11tarik Risaw 2018, ka la ioh shibun ki telephone na u nongtrei jong ka admin department jong ka Supreme Court. “Ha kajuh ka miet, haba nga la sdang kyndit bynriew halor ki jingjia kiba la jia ha katei ka sngi, nga phone ha ka telephone number jong U CJI, namar ba nga kwah ban iathuh ba ngam treh shuh ban trei bad u, hynrei um shim satia ia ka phone jongnga bad ula phah ba un phone U Personal Secretary jongu, ha kaba ula ong ba ym dei ban pynthut ia U Chief Justice ha ka por miet, wat la ka ju long ka jingmlien jongu, ba un phone bad whatsapp ianga ha ka por mynmiet” kam katei ka nongtrei.
Katei ka nongtrei ka kam, ba ka la poi trei bad U Justice Gogoi ha U Risaw 2016 bad hadien kata, u ju khot ia ka sha ka kamra jongu, ban wan rah ia ki rai na kashari ha ka por 8baje man ka step bad nangta ka iathuh ba ha ka 31tarik Naitung 2018, U Gogoi, ula phah ba kan leit ialam ia u lok jongka ban ia kynduh bad u bad ka iathuh shuh shuh, ba ha kawei ka step, U Gogoi, ula khot ia ka sha ka kamra jongu bad ula kylli, ba balei kam shym la jubab satia, haba u phone ia ka bad hangta ka iathuh ba kam ju shim ia ki number kiba kam shym la ithuh lypa bad mar kumta, ula phone ha khmat jongka hi bad u sa phah ba kan buh bha ia katei ka number jongu.
Na ka liang jong U Secretary General ka Supreme Court, ula iathuh, ba ula ioh ia ki jingpan jingshai na ki kotkhubor, hynrei ka jubab, ka long ba kitei ki jingkynnoh ki long kiba bakla.
Phi don ban ong eiei?