Kynnoh ka komishon na US, ba ka NRC, dei ka tiar ban pynlong poiwir ia ki Muslim

Ka US Commission on International Religious Freedom (USCIRF), ka kynnoh ba ka National Register of Citizens (NRC) ha Assam, ka dei ka atiar ban pyn kylla poiwir ia ki rit paid Muslim ha katei ka Jylla.

Katei ka jingkynnoh, ka dei hadien ba la pynmih paidbah ia ka thup jong ka NRC, ha ka 31tarik Nailar 2019, ha kaba ki don 19lak ngut ki bym rung kyrteng satia ha katei ka thup jong ka NRC.

Katei ka thup jong ka NRC, ka pynduh noh ia ka jinglong nongshong shnong jong ki 19lak ngut, ong ka Commission.

Ki dang don shuh sa shibun kiwei pat ki seng jong kiwei pat ki ri, kiba kynnoh beit beit ba ka NRC, ka dei ban ban khanglad kyrpang ia ki Bengali Muslim kiba don ha Assam, na ka bynta ban pynlong ia ki Muslim, kiba khlem jylla.

Ka USCIRF, ha ka kaiphod jongka ka kynnoh ba katei ka dei ka jingthmu ban ban ktah ia ka jingsngew niam lane kaba khanglad ia ka jinglong laitluid jong ki kynhun niam ha India.

U nongbud dien ia katei ka kaiphod, U Harrison Akins, u kren shai beit ba kane ka jingleh halor ka NRC, ka dei beit ka jingleh niew bein ia ki Muslim bad la ong shuh shuh ba kane ka dei ka jing pyni shai ba ka sorkar India, ka kwah ia ka jinglong nong India, tng ia ki jait bynriew Hindu.