Shillong: Ka kong Hunmon Ryngad ka la kynnoh ba ka khun ksiew jong ka ka kong Betsy Passah ba ju khot Elizabeth ka la tuh lut ia baroh ki jingdon jingem jong u kpa jong ka uba la iap noh u bah Collinson Roy Ryngad (u khun jong ka kong Hunmon). Ka la iathuh ba ka la pyntip pulit bad kumjuh sha ka Meghalaya Commission for Women hynrei ki jingujor jong ka kim seisoh bad ka la don hapdeng ka jingkutlad.
Haba ia kren bad ki nongthohkhubor, ka kong Hunmon ka la iathuh ba u khun jong ka u la khlad noh ha ka 15 tarik u nailar, 2018 bad bad ha ka 21 tarik u nailar ka la leit sha ingsah wai u khun jong ka kaba don ha Umkdait, Nongmensong bad ka la lap ba ki kot ki sla bad ki jingdon jingem u khun jong ka kim don shuh bad ka la kynnoh ba dei beit ka khun jong u kaba tuh.
Ka la ujor FIR sha ki pulit ha ka 21 tarik u nailur, 2018 bad ha katei ka FIR ka la kdew ba ki kot ki sla khyndew kiba dei ha Mawsiatkhnam (Mawlai), ha Mawlynrei bad ka Umroi Airport kiba don ha ka kyrteng u khun jong ka kim don shuh. Nangta ka la ong ba 3 tylli ki kali ka Zen, Hyundai bad Maruti Car kim don shuh, nangta ki ATM, Pass Book bad ki kot kali, ki TV, ki Speaker, ki Tape Recorder bad 2 tylli ki sati kim don shuh. Ka la ujor ruh ba ka pisa kaba haduh T.20 lak tyngka kam don shuh.