Shillong: Ka Hynniewtrep Youth Council (HYC) War Jaintia Circle lyngba ka RTI ba la buh ha ka 07tarik Jymmang 2021 ka la lap ia ka jyrsieh jingthung kam thungjam da ka office U Sub- Divisional Officer (Civil), Amlarem Sub-Division. Ha ka 26tarik Iaiong,2021 ka office U Sub-Divisional Officer (Civil) Amlarem ka la khot application (Advertisement) naka bynta post LDA bad Process Server hynrei kaei kaba sngew lyngngoh ban tip ba ha ka 27tarik Jymmang 2021, katei ka office ka la dep thungkam sop sop lypa ia arngut ki briew na ka bynta post LDA da kaba iaid lait katkum ka advertisement ba la pynmih ha ka 26tarik Iaiong,2021 bad ka notice kaba mih ha ka 19tarik Jymmang, 2021.
Katkum ka advertisement kaba don ia u No.ASD/Estt/43/93/Pt.1/137,Dated Amlarem the 26th April
2021 katei ka office ka la thmu ban pynlong ia ka examination na bynta post LDA ha ka 8.05.2021, bad
post Process Server ha ka 15.05.2021 hynrei namar ba don ka jingkhang dam na ka jingkiew ka
jingsaphriang sted u khñiang jingpang Covid-19 kumta katei ka office ka la pynlong ia ka examination
na ka bynta post LDA ha ka 13.09.2021. Ha shwa ka 13.09.2021 ka seng ka la lap ba ha ka 27.05.2021
ki don arngut kiba la ioh kam lypa na ka bynta ki kam LDA. Shuh shuh ka seng lyngba ka RTI ka lap ruh ba hakine ki snem bala dep ka jur bha ka jyrsieh thung kam sop sop dakatei ka office khlem da pyntip paidbah bad pynbna advertisement. Kitei ki briew ba shah thung kam sop sop ki dang iai trei haduh mynta haka tei ka office.
Ha kaba iadei bad kane, na ka liang ka seng ka ai por 7 sngi ia ka ophis U Sub-Divisional Officer (Civil)
Amlarem Sub-Division ban wengkam noh shisyndon ia kito ki arngut, kiba ioh kam ha ka
27.05.2021 bad kumjuh ruh ban beh kam lut ia baroh kito kiba shah thung kam sop sop ha kine ki snem
ba la dep, lym kumta ka seng kan ai da ka jingthoh sha ka tnad CBI bad kan dawa artad ruh daka PIL sha
iing bishar khnang ban lap iakito kiba don kti ba kin shah pynshitom ha kti jong ka aiñ.
Phi don ban ong eiei?