Kynnoh ka HITO, ba jah klep ka pisa T.57 klur ha JHADC

Shillong:Ki dkhot jong ka Hynniewtrep Integrated Territorial Organisation, myn hynnin ka Sngi thohdieng ki la wan ban sei madan halor ka jingdon jong ka jingbamsap kaba shyrkhei ha Jaintia Hills Autonomous District Council.

Ha ba iakren bad ki lad pathai khubor, U bah Donbok Dkhar u President HITO, u la iathuh ba wat la ka Seng kam pat dep ban pynlong ia ka jingpynrung riewdkhot ha ka seng, hynrei haba ka seng ka la lap ia ki jyrsieh kiba don ha Rilum Jaintia, kumta ka Seng kam banse ban mih shuwa sha khmat ban sei madan ia kane ka kam bam sap.

Na ka liang U General Secretary, ka seng, u bah Wanbud Dkhar, u la iathuh ba ka Seng ka la lap ia kawei ka jingjyrsieh bam sap lyngba ka jingwad RTI ha u snem 2018 halor ka jingjah klep ia ka pisa kaba la kot sha ka T.57,809,700. Kane ka long ba kat kum ki kyndon jong ka JHADC, lada ki check gate ki lap ia ki kali kiba ymbiang ki kot ki sla, kin lah ban dain kuna T.1000 haduh T.1lak.

La iathuh ba kat kum ka jingioh lum jingtip jong ka Seng na District Council, ka long ba ki check gate kiba don ha ka shnong Sonapur East Jaintia Hill bad kawei ha Mawjyndur West Jaintia Hill.

Naduh u bnai Nailur 2018 haduh bnai Rymphang 20 ki kali beain kiba la ioh kem ha kine ki check gate ki long 58,293 tylli bad haba la khein ia ka pisa kaba ka council ka la buh ban dainkuna, lada tang T.1000 na kine ki 58,293 tylli, kumta ka pisa ka poi haduh ba T.5,82,93,000 bad kat kum ki jingioh lum jingtip ka seng ka la lap ba ka pisa kaba poi sha ka Council ka long tang T.4,83,300 kaba pawshai ba haduh T.57,809,700 ka jah ka pisa.

Na ka liang jong ka HITO, ka buh ia ka jingkylli sha ka JHADC ba shaei ka jah ka pisa, katba ki nongtrei jong ka district council ki khlem ioh tulop la 11 bnai bad la kyntu ia u CEM, ki EM bad ia ki ophisar ba kim dei ban leh ia kum kine ki kam ba pynthohbria ia ka District council.

“La iathuh ruh ba na ka liang ka seng kan iaid kat kum ka lynti jong ka ain, wat la kane ka dei ka jingjia ka ba naduh ka EC barim, hynrei ka EC thymmai balei ka sngap jar halor kane bad haba ka EC ka sngap jar ka mut ba ka EC thymmai ruh ka donkti lang ban bam ia ka pisa u paidbah ” u la bynrap.