Kynnoh ka High Court, ba rai marwei ka KHADC; pynsangeh ia ka elekshon jied Sordar Raid Shabong, ha ka 9 Nailur

Shillong:Ka High Court of Meghalaya, ha ka sngi hat majai, ka la pynmih, ia ka hukum, ba ka elekshon ban jied Sordar, ha ka Raid Shabong, ha ka 9tarik Nailur 2023, yn pynsangeh shwa, ia mynta shipor bad ka kashari, ka la buh por biang, ban shong bishar, ia kane ka kam, ha ka 15tarik Nailur 2023.

Katei ka jingshong bishar, ka dei halor, ka jingleit ujor jong U bah Johnson Lyngdoh, pyrshah ia ka Khasi Hills Autonomous District Council, kaba la pynmih ha ka 25tarik Nailar 2023 bad nangta, ia ka jingpynbna, ha ka 28tarik Nailar 2023, ha kaba iadei bad ka jingpynpep bad pynbna, da kawei pat ka tarik, ia katei ka elekshon Sordar Raid Shabong.
La ong, ba ka tarik jong ka elekshon, ka dei ban long ha ka 26tarik Nailar 2023, hynrei, la pynsangeh noh, da ka hukum, kaba 25tarik Nailar 2023 bad nangta, da ka jingpynbna, kaba 28tarik Nailar 2023, la buh sngi, ban jied Sordar, ha ka 9tarik Nailur 2023.

Ha ka dorkhas, sha ka kashari, la iathuh, ba ka jingpynkhreh ia ka elekshon, ka la iaid shakhmat, hynrei, ka Council, ka la pynmih hukum ban sangeh noh pynban, na ka daw jong ka jingbym pynrung kyrteng ia ki nongthep vote.
Ha ka jingiasaid, la iathuh shai, ba kat kum ka ain The Khasi Hills Autonomous District (Administration and Election of Sordars of Saw Raid, Khyrim Syiemship) Act, 1997, ka la thaw ia ka elekshon komiti, katba kum ka Section 4 bad nangta ka la buh kyndon ruh, ban pynkhreh ia ka voter list, ha ka Section 5 bad la kynnoh namarkata, ba ka jingleh jong ka District Council, hadien, ba la buh tarik, ia ka elekshon, ka long pyrshah ia katei ka ain bad kam dei tang katta, hynrei, kam shym la ailad ia kiwei pat ki kyrtong, ban ai jingujor lada ki don eiei, halor kitei ki kyrteng, kiba pynrung thymmai.

Halor kitei ki jingujor, ka kashari, ka shim, ba ka jingpynsangeh ia ka elekshon, ka dei halor ka jingpynrung kyrteng biang, ia ki nongthep vote bad la shim ruh, ba katei ka dei ka rai, kaba la rai marwei da ka District Council bad ba ka Election Committee, kam don bynta eiei ruh em bad dei na kata ka daw, ba la rai ban buhteng shwa ia katei ka elekshon jied Sordar ha Raid Shabong, ia mynta shipor.