Kynnoh ka Congress, ba shah rahbor U MDC ha ka NPP ha GHADC

Shillong: Ka Congress ka kynnoh ba ki MDC ka NPP, ki la rahbor ia u MDC ka seng Congress.

Katkum ki khu bor ba ioh lum na thain Garo Hills u MDC na ka Garo Hills Autonomous District Council (GHADC) jong ka seng Congress u Boston Marak u la shah rahbor mynnin ka meit kumba 11 shiteng na ing sah jong u na Tura.

Haba kren bad u Rupang u MDC jong ka 1-Siju Konstitwensi u Kenedick S. Marak u la iathuh ba katkum ka jing iathuh ka lok u Boston Marak lyngba ka ejahar la ong ba ha ka meit 7 tarik kyllalyngkot 2020 ar ngut ki MDC ka NPP, lem bad u Benedict Marak u ba dei ruh u MLA bad MDC ryngkat ka jing synran lang u MDC ka Wagesik u Sengnal Sangma ki la wan sha ing jong ki bad ki la ialam lang ia u.
U Kenedick S. Marak u la ong ruh ba ka lok u Boston Marak ka la dep ai ejahar pyrshah ia ki MDC ka NPP halor ka jing jah u Boston Marak hapoh ka Araimile Beat house. U la ong ruh ba katkum ka jing iathuh ka lok u Boston Marak, u Boston Marak u phone ia ka na uwei number bad u la ong ruh ba ki mut wan sha Shillong.
U MDC ka 1-Siju u Kenedick S. Marak u la ong ruh ba na ka liang ka seng ka khlem pat ai ejahar namar ba la dep ai lypa da ka lok u Boston Marak. U la iathuh ruh ba ka seng ka la dep kyntu ia ki bor pulit ban shim khia halor kane ka jing jah jong u Boston Marak bad ki pulit ruh ki dang pynlong ia ka jing tohkit ba kham bniah.