Kynnoh ka Assam, ba ki pulit ka Mizoram, ki tih krem ha ki jaka khappud

Guwahati: Ka sorkar Assam, ka kynnoh ba ki pulit jong ka Mizoram, ki la sdang ban tih ia ki krem ha u pud u sam, uba don mar pud bad ka Assam bad katei ka la nang pynmih ia ka jing pyrshah jur da ki nongshong khappud ha Assam.

Ha ka shithi sha ki bor pyniaid jong ka Kolashib District jong ka Mizoram, U Keerthi Jalli, Deputy Commissioner, ka Cachar, u iathuh ba ka jingtam pud jongki, ha Kulicherra, kan nym pynthut satia ia ka suk ka sain ha katei ka jaka. La ong ba ki don ki jingtih krem bad kiwei de ki jingtei ha ka surok bah NH 306, ha kaba la pyntih da ki mashin JCB.

Kawei pat ka khubor ka iathuh ba ka Mizoram, ka wan kit mynta ia ka petrol, diesel bad ka lyer shet bad kiwei ki jing donkam jongka na Manipur bad na Tripura. Katei ka long, namar ba ka Assam, kam shym la pyllait satia ia ka leit ka wan ki kali, kiba iaid lyngba katei ka jylla, ban rung sha katei ka Jylla.