Shillong: Ka Amita Sangma, kaba la shah shoh lang bad ka kong Agnes ha Sohshrieh, ka kynnoh ia U Ma Nidamon Chullet, ba u dei uba shoh ia ki, ha ka 8tarik Naiwieng 2018 ha Sohshrieh.
Ha ka jing ujor jongka sha U Director General of Police, ka Amita, ka kynnoh ba U Ma Chullet, uba dei ruh u nongialam ba rangbah jong ka seng National People’s Party (NPP), u dei uwei na kiba donkti ha katei ka jingshah shoh jongki ha katei ka sngi ha Sohshrieh. Ka Amita, ka dawa ban kem mardor ia U Chullet, uba dei ruh U President jong ka Jaintia Hills Truck Owners Association.
Kat haduh mynta, kiba shah kem, ki la long hynniew ngut baroh bad ia U Ma Showmewell B. Kyndait, la kem na ka kad liengsuin ha Guwahati, ha kaba la antad, ba u mut ban leit sha Bangalore bad ha shwa jong kata, la kem ia ka Skemlang Dkhar (44) na Mooralong, Jowai.