Kynnoh ka ABVP, ba don kiba shah bom tyrnem ha ka rakhe holi ha NEHU

Shillong:Ka seng Akhil Bharatiya Vidya Parishad (ABVP), kaba dei kawei na ki seng ba heh tam ha ri india ka la pynremjur ia jingthombor jong ki katto katne ki briew ha ka jinglamkhmat jong u Easterson Sohtun, Aditya Sourav bad u Gurudutt Tripathi ha ka prokram bala pynlong da ka World Organisation of Students and Youth (WOSY) ha North Eastern Hills University (NEHU).

Ka World Organisation and Youth ka la pynlong ia kane ka prokram ban rakhe ia ka holi ha pyrshah jong ka pung NEHU,ha ryngkat ki samla pule na ri Russia, Bhutan bad Bangladesh.
Ka WOSY ka dei ka seng kaba don ia ka motto The World is a Family, kaba wanrah ia ki samla pule na kylleng jong ka jylla ki ri ban rakhe ia ki tamasa ban sngewthuh ia ka kolshor,riti dustur ban pynkhlaiñ ia ka jingsngew shipara bad ka jinglong kawei.
La pynlong ia kane ka prokram hadien ba la ioh jingbit na ki bor pyniaid jong ka NEHU, hynrei kane ka prokram ka la shah pynthut noh ha ki briew kiba la wan pynkulmar ha ka jingialam jong u Easterson Sohtun,Aditya Sourav bad u Gurudutt Tripathi, u ba la tied da u tyrnem ha kaba katto katne ngut ki la mynsaw.

Kane ka jing jia ka la jia ha ka 25 tarik lber, ka dei ka jingpynkheiñ ia ka hok long briew ban pynpaw bad ialum lang,ka long kaba sngewkhia ba ka prokram ban rakhe da ka jingjai jai bad pyni ia ka riti dustur ba markylliang ba kan shah pynthut ha kaba ka la pynsyier ia ka jing shngaiñ jong kito kiba la wan ban iashim bynta,ka la don ruh kum kane ka jingjia ha kaba u Eastarson Sohtun, u la pyrshang ban ktah kti ia ki dkhot jong ka WOSY.
Ka ABVP ka ngeit skhem ba ka jingleh jong kine ki riew shim kabu kam don jaka satia ha ka ri synshar paidbah bad ka jingleh jong ki ka buh jingma ia ki samla pule.

“Ngi buh jingkyrpad ia ki bor pyniaid jong ka skulbah NEHU ban kin shim da ka rai kaba tyngeh ia kito kiba don bynta ha kane ka kam bad kito kiba donkti dei ban ai da ka jingbishar bad ban tehlakam ia kum kine ki jingjia hadien habud” ong ka kyrwoh jong ka seng.

Ka ABVP, ka la ai jingkyrshan ruh sha ki samla pule ba la pynlong ia kane ka prokram, wat la ka la shah pynthut noh bad ka wer ruh ia baroh kiba ia don bynta kynthup ia ki bor pyniaid jong ka skulbah ban pynremjur ia kane ka jingleh riewkhlaw ban wanrah pat ia ka jingshngaiñ ban ialong lang kawei bad ia kren sani.