Shillong 14 Nohprah: U wei u tymmen bar jylla ia uba la tip kyrteng u Anand Agarwal ula shah kynnoh, ba ula ktah kti bad leh khlemakor ia ki 3 ngut ki samla khasi ki ba trei bylla ha ka dukan Roshni ka ba don ha 9-lad, ka ba la dei trai da ma u hi. Kane ka jingshah ktah kti bad shah leh khlemakor kitei ki samla khasi kadei ka ba la jia mynta ka sngi saitjain ka 14 tarik Nohprah 2024 ha kapor ba ki dang trei bylla.
Hadien ba la jia katei ka jingjia shah ktah kti kitei ki samla khasi namar ka jingtieng bad khynniuh palat, ha kaba kim nud shuh ban rung shapoh dukan namar ioh ba un sa leh biang kumjuh.
Hadien katto kattne por kitei ki samla ki la pyntip noh mar mar sha ka seng Hynniewtrep Integrated Territorial Organization (HITO) Shillong city, bad hadien kata la wan poi noh ka seng HITO ha jingialam u samla Banpyntngen Syiemlieh uba dei u president ki la leit ha katei ka dukan ubar jylla ban iakren ha ka ba iadei bad kane ka jingjia.
Ha ka jingiakren ka seng HITO da kaba jai jai ryngkat u tei u bar jylla ha ka jingiadonlang kitei ki samla khasi, ha kaba u tei u bar jylla ula aidaw da kaba ong, ba ngam shem la leh khlemakor hynrei nga kheiñ ia ki kum kita ki khun lajong haba ki trei ha ka dukan jongu, hynrei ki samla khasi ki la kniehktien da kaba ong, ba ymtang ba une ubar jylla u shu leh kumta, hynrei u da ktah ruh sha ki met ba shapoh ki bym dei ban ktah bad thmu ban leh khlemakor.
Ha ka jingiakren bad kitei ki samla khasi ki ba la shah leh khlemakor ha utei u tymmen bar jylla uba dei ruh u trai katei ka dukan Roshni ki la iathuh, ba ym tang mynta ka sngi ba u leh khlemakor kumne hynrei man kapor, da kaba ktah ia kimet ki bym dei ban ktah ruh.
Kitei ki samla ki la iathuh, ba ka jingktah kti une u bar jylla ka la jia bun sien ym tang ia ki, hynrei ia ki ba bun ki nongtrei ki ba la phet trei noh na kane ka duka namar ka jingmlien ban leh khlemakor bad kim shem la nud ban iathuh ne leh eiei.
Ki la thuh ruh,ba mynta ka sngi namar ba kim lah shah shuh ia ka jingleh jong une ubar Jylla,ki la dawa ba un dei ban ai tulop noh ia ki ba kin mih noh na Kane ka jaka, watla ki la ong,ba kin ujor sha ki sengbhalang utei u bar Jylla u la kren heh da kaba ong,ba khie leit khot Ngam tieng ia kita.
Nakaliang kawei pat la samla ka ba la trei slem ha katei ka dukan ka la iathuh, ba man kapor u ju wan thap ban ktah ia kamet, hynrei ban ieng marwei pat im lah namar kim ngeit ia kata ka jingleh ubar Jylla,hynrei mynta pat ba la don ki arngut ki ba la shah ktah ktilang kumta ka ka shngaiñ ban phla ia baroh ki jingjia shah leh khlemakor. Nalor kata ka la ong ruh, ba lada kwah ia ka jingshisha kidon bun ki samla khasi ki ba la shah leh khlemakor kumjuh ha une u ber Jylla ki ba la phet ban trei na Kane ka dukan.
Nakaliang u president ka HITO Shillong City u samla Banpyntngen Syiemlieh Ula ong,ba kum Kane ka jingjia ka la ju jia man kapor ym tang mynta ka sngi bad na kapor sha kapor ba ju shah ktah kti ki samla khasi,da kaba Ula khot ba kin dei ban mih shakhmat ban iathuh ia ka jingshisha.
Ka seng ka la phah khang shisyndon ia katei ka dukan ban nym dei shuh ban plie kat haduh ban da ia beit ia ka kam bad hadien kane ka seng ryngkat kitei ki samla khasi ki la leit ban ai da ka ejahar pyrshah ia utei u bar jylla sha sadar police station.
Kumjuh ruh ka seng ka la maham da kaba tyngeh, ba ba lada ka ain kam treikam ban leh eiei ia une ubar jylla, ka seng kan sa leh hi ia la kajong ka kamram.
Phi don ban ong eiei?