Kynnoh ba bam ei, ki nongtrei ka Municipal ia u Momo, sikret

Shillong, 5 Nohprah:
Mynta ka sngi ki nongdie madan ki la mih paidbah sha ka jingthang mombati kaba long ha Khyndailad, katei ka jingmih paidbah jong ki ban thang mombati ka dei ban pynpaw ia ka jing-pyrshah ia ka jingkhynra ka Municipal ia ki nondie madan bad ban pyni ruh ba naduh mynta ka janmiet ki la ia tylli kawei.
Haba kren sha ki nongthohkhubor, ka kong Angela Ryngad kaba ialam ia kitei ki nongdie madan ka la ong ba naduh mynta ka janmiet ki nongdie ki la tylli kawei, wat la kim pat don seng ruh bad kin sdang ban pyni bor ia ka sorkar naduh lashai ka sngi ha kaba kin phriang ia ki tiar jong ki kumba ki ju die bad lada don ka jingkhynra kin ieng tylli kawei ban pyni bor.
Kawei ka longkmie haba kren sha ki nongthohkhubor mynta ka sngi ka la iathuh ba haba ki nongtrei ka Municipal ki wan khynra ki bam ei ki dih ei ia ki mar jong ki bad kim ju pynphai shuh, ka la ong ba haba ki khynra ia ki nongdie momo ki bam ei ia ki momo , haba ki khynra ia ki nongdie kwai nongdie sikret ki dih ei u sikret ruh. Ki nongdie madna ki la rai ban dawa na ka Municipal ba ka dei ban pynphai noh ia ki mar ba ka la kurup naba ki shim ba kim dei ki nongtuh hynrei kiba kamai ban im jakpoh.
Ki la kynthoh ruh ia ka jingailad ka Municipal ia ki kali ban ieng pynkhapngiah ha surok katba ia ki nongdie madan pat ki wit. Ki la ong ba kin iai bteng ia katei ka jingpyni bor jong ki katba ka sorkar kam pat lah ban kdew ia ki hangno ki jaka ba ki dei ban shong.