Kynmaw Tirot Sing ka Mawlyndun

Shillong, 26naitung:
Ka Mawlyndun Socio & Cultural Welfare Organisation ka la pyn long ka jingrakhe kyn maw burom ia u Tirot Sing ha ka 17 tarik u nai tung ha Mawlyndun. Ia kane ka prokram la pyn iaid da u Phanuelson Khonglam President ka seng. Ha kane ka sngi la ioh ki jingkren ki ba la iathuh bad pynkynmaw ia ka jingim u Tirot Sing u ba la aiti ban pha ia ka jingim na ka bynta ka jaidbynriew. Ha kajuh ka por ka jingkren halor ka jingkordor ka jingnang jingstad kaba baroh dei ban shim khia bad iabeh. Ka jingbym leit skul bad jingpep skul shiteng por kaba long ka jingtim bad jingbabe ka jingim. Te da kawei ka sur la kyntu ia baroh ki kmie ki kpa, samla bad khynnah skul ba ki dei ban trei shitom bad beh sha ka jingnang jingstad, ha kaba la ioh ka jingkren na u Babu L.Kynta Nonghikai Mawlyndun U.P School Bah Robet Khonglam, Robinson Khonglam Rangbah Shnong Mawlyndun bad ka Kong Thlida Marbaniang President Women Social Welfare Organisation Pynursla.
Ha ka juh ka por la ioh ka jingpynkup burom ia u Kynnamlin Khongwet u ba la pass bha ha ka SSLC Examination 2015 da ka Kong Thlida Marbaniang , la pynkup burom ia utei u samla da ka song pisa bad ka sertiphiket.
La pynshongshit shuh shuh ia kane ka prokram da ka jingrwai, jingshad na ki Khynnah Skul, ka jingrwai na u Bah Janis Khongsdir, Kynnamlin Khongwet bad ka jingshad Mawja kaba baroh ki paidbah ki la shim bynta.Katkum ka kyrwoh ba la phah da u Wengstone Rangjem General Secretary ka seng.