Kynmaw ka KSU Wahthapbru, ia arngut ki nongialam ba la khlad

Shillong:Ka Khasi Students’ Union (KSU) Wahthapbru Unit mynta ka step jong ka 23tarik u bnai Nailar 2021, ka pynpaw ia ka jingkynmaw burom ia ka lyngkhuh sngi iap ba 21 jong ki arngut ki nongialam ba shitrhem jong ka seng, kiba kynthup ia u Samla Dawanbiang Shullai, Asst Finance Secretary KSU CEC bad u Samla Rocky Shylla, Sport Secretary KSU Wahthapbru Unit kiba lah kyllon iap ha ka ktang suloi ki pulit ka jylla Meghalaya ha ryngkat u ehrang ka HNLC, u Balajied Dkhar.

Ban shu pynkynmaw ba kitei ki arngut ki nongialam ba shitrhem jong ka KSU ki lah shah bthat jubor la ka jingim ha ki pulit ka jylla Meghalaya ha ka 23 tarik, Nailar u snem 2000, ha Nongshiliang Shillong, katba ki dang ia shongkai ha ka wei ka ïing bad u Balajied Dkhar u ba ju khot ieid u Hepkhoit uba dei u dkhot jong ka HNLC, hynrei kum ha katei ka por, kyndit kynsan ki pulit ka jylla Meghalaya kiba wan khynra ia katei ka ïing ki lah shu synreit kuli naphang ia kitei ki laingut ki Samla Khasi da ka jingsuba ba ki dei ki dkhot jongka kynhun lehnoh NSCN-IM.

Kumta, ha kane ka sngi na ka liang ka KSU Wahthapbru Unit, ka iai pynkynmaw ba ka dei ka sngi kaba dum tam ia ka jaitbynriew bad kum ka seng da leilei, kam lah ban shu klet noh ia ki dak mong kiba la kylla sohkhliang bad shi junom ka seng, kan iai pyrto nam ban pynsah jingkynmaw ia ki nongialam bad ki dkhot ba ha shuwa, kiba la pha ïa la ka jingim nabynta ka dawbah jong ka Ri ka jaitbynriew, “Ngi iohi ruh ba haduh kat kine ki sngi na ka liang ka tnat pulit ki thrang eh hir hir ban khylliap lama noh ia ka seng KSU da ka jingpharep ba har rukom da ka jingpyrshang ban pyntieng koh tympan ha kiba bun ki liang ia dkhot da ka jingbom jing tied, ka jing set patok bad wat haduh ban shim syndon ia ka jingim jongki dkhot ka seng ruh kim salia shuh hynrei kynmaw ba kine kiei kiei baroh kim lah ban pynkhyllem ia ka jinglong rangbah ka seng bad ka nongrim baskhem jongki dkhot bad ka ong kumba nang phrang shuh shuh ia ka mynsiem ialeh ka bym pyndem nabynta ban ai ia ka jingshakri bahok ïala ka Ri ka jaitbynriew” pynkut ka kyrwoh na ka KSU Wahthapbru Unit.