Kynmaw Ïa U Prof. Evanton

Shillong, 3 Nailar:
Ka St. Edmund’s College ryngkat ki nong hikai nongtrei bad ki sam la pule, ka la pynlong ka jingïalang sngewlem ha ka 3 tarik u ‘Nailar, 2015 ban kynmaw ieit bad burom ïa u Prof. Evanton W. Reade Syiem uba la khlad noh ha ka 2 tarik u ‘Nailar, 2015. Ha kane ka jingïalang, u Dr. Sylvanus Lamare, Principal, St. Edmund’s College, u la ïathuh bad pynkynmaw shaphang u Prof. Evanton W. Reade Syiem. Ïa u Prof. Evanton W. Reade Syiem, la kha ha ka 16 tarik u Risaw, 1916 ha Wahingdoh, Mawkhar East bad u dei u khun jong i Kong Shim kiri Syiem bad Bah Wil son Reade. U la pule ha Shillong Government High School bad pas degree na St. Edmund’s College ha ka snem 1941.
Mar ïadep pule, u la rung ha ka kam shipai bad shim bynta ha ka Thma Bah Kaba Ar naduh ka snem 1941 haduh ka snem 1946. Nyngkong, la phah ïa u sha South India ha ka 19th Division. Hadien la phah ïa u sha Manipur, Chim Hills and sha Burma ha ka 48 Bridgade jong ka 17th Division. Naduh ka snem 1949 haduh 1952 u la pyndep ïa ka MA ha ka Church History na Baptist Divinity School, Berkeley, USA. Ha ka snem 1953 u la hikai ha Mount Hermon School Daejeeling. U la rung kum u nonghikai ha Mawkhar Christian High School ha ka snem 1954 bad u la don ka bynta kaba khraw ha kaba sdang ïa ka skul miet na ka bynta ki khynnah kiba duk. U la long u Headmaster jong kata ka skul miet naduh ka snem 1954 haduh ka snem 1964. Hadien kane ka skul miet ka la kylla long noh ka skul step. U la rung kum u nonghikai ha St. Edmund’s College ha ka snem 1964 bad u la shong thait kum u Head, Khasi Department ha ka 31 tarik u risaw 1976 hynrei la bthah ïa u ban bteng ha ka kam haduh ka snem 1977. Hapdeng ki khynnah ha kata ka por, la ju khot ieit ïa u da u Babu Ban.
Ha ka snem 1982 u la sdang kawei ka skul English ha Smit, Khyrim Syiemship. U la long u dkhot bashit rhem jong ka Khasi National Dorbar. U la ai ruh bun ki kot ki sla kiba kordor sha u Bah L. G. Shullai (bam kwai ha dwar u Blei) uba la long u dkhot jong ka National Forum, uba la pynmih ha ka dur jong ki kot kiba long mynta ka spah bah jong ka jait bynriew. U ju shim bynta ha ka jingïapynïaid shnong, Dorbar Shnong bad ruh ha ki kam Hima. U la kyrshan ïa u Babu Frank M. Pugh bad Prof. R. S. Lyngdoh ha kaba pynbiang ïa ka jingdonkam ka sobjek Khasi kum ka elective, MIL bad honours. U la long uwei na ki dkot uba la seng ïa ka Syngkhong Kyntiew Ri. U la thoh ïa Ka Synjuk Lang Ki Hima Khasi (Federation of Khasi States), ha ka snem 2004 bad u dang thmu ban pynbha ïa ka da ka kyrteng Ka Ri Khasi: Ka Jingthmu Ban Pynkylla Dur Ïa Ka bad sa kawei ka kot pat, Ka Congress – Hynnin, Mynta bad Nangne Pat Shano? ha ka snem 2006.
Ka jingkhlad noh jong u Prof. Evanton W. Reade Syiem, ka long ka jingduh kaba khraw ïa ka College, ka Ri bad ka Jaitbynriew. Ka jingsngewlem ka leit sha kiba ha ïing ha sem bad baroh kito kiba don ka jingïadei kaba jan. To ka mynsiem u Prof. Evanton W. Reade Syiem kan shong jah thait ryngkat bad u Kynrad. Ka la don ka jingïasngap jar kaba shi minit kum ka jingkyn maw burom ïa u Prof. Evanton W. Reade Syiem.