Shillong: Ha ka 29 tarik Nohprah shisngi shwa ka lyngkhuh sngi iap ba 156 snem jong u Woh Kiang Nangbah ka KSU Mawkynroh Umshing Unit hapoh ka jingialam u President, Secretary bad baroh ki dkhot jong ka unit kila lah ban pynlong ia ki jingialehkai ba shisngi kum ka dak ban kynmaw burom ia utei u Khlawait uba kum ka Jaidbynriew ka la pynmih. Ha katei ka sngi ka unit ka la pynlong shwa da ka jingiamareh marathon ha ka por mynstep ha kaba la iawan shim bynta shitrhem da ki hep kiba rit kiba la pynshongshit ia ka jingiamareh bad ha ka por 10 baje mynstep ka la don sa ka jingiasiat khnam hapdeng ki para nongshong shnong jong katei ka shnong bad hadien kine ka bud sa ka jingialang sam khusnam. Ia katei ka jingialang la pyniaid da u secretary jong ka unit bad la pdiang sngewbha da u president. La ioh ia ka jingkren na u rangbah shnong bad ula iaroh ia ka unit kaba la lah ban pyniaid beit ia ki prokram kiba pher tad haduh kaba kut.
La ioh ruh ia ka jingkren na u president jong ka circle u Samla Biangbor L. Paliar uba la pynkynmaw ia ka jinglen lade utei u Khlawait kat haduh ba um salia ban iakhun pyrshah ia ki bor kiba nabar kiba mut ban wan tuklar iaka synshar ka khadar ha kane ka Ri baieid. La ioh ruh ka jingkren na u bah Teibor Pathaw, symbud kongsan, uba long u kyrtong ban ia aireng ha ka elekshon MDC 2019. Une u rangbah ula pynpaw ia ka jingdonkam ban kyntiew ia ki kam ialehkai ha kine ki sngi khnang ba ki samla kin lait na kino kino ki jingmlien ba sniew kiba ker tawiar iaka Jaidbynriew. Khatduh la ioh ia ka jingkren na u samla rangbah u bah Daniel Khyriem, president barim jong ka KSU Sengkmie uba la pynpaw ia ka jingsngewkmen ba kum ka unit ka kynmaw ban khot lang ia ki nongialam kiba rim bad ha ka jingkren ka jong u ula pynpaw ba kum ka jaidbynriew ngi dang donkam ia shibun ki Kiang Nangbah, ki Tirot Sing bad kiwei de ki riewkhraw ki ban iakhun na ka bynta kiba bun ki dawbah kiba ka jaidbynriew ka hap ban iaid.
Hashwa ban pynwai noh ia ka jingialang la ioh ia ka jingsam iaki khusnam sha ki nong ialehkai kiba la jop ha kitei ki ar tylli ki jingialehkai bad kum ka jingwanrah ia ka jingiadei bad ki nongshong shnong ka unit ka la sam ruh da ki jaiñ tapmoh sha ki 30 ngut ki longkmie jong katei ka shnong.
Ha katei kajuh ka sngi ka KSU Mawlai Mawiong Umjapung Unit ruh ka la pynlong ia ka prokram kaba shitrhem. Ia kane ka lympung la plie pyrda da u samla Joe Joplin Marbañiang uba dei u Organizing Secretary barim jong ka KSU Sengkmie.
Ki samla ialehkai phutbol hashwa ka jingiapynibor ha ka lympung ba la pynlong da ka KSU.