Kynmaw burom ia U bah Shylla

Shillong:Ka iing dorbar jong ka KHADC myn hynnin ka sngi ka la kynmaw burom ia U MDC barim jong ka iing dorbar u ba la khlad noh u Bah HS Shylla ba dei ruh u CEM barim jong ka KHADC.

U CEM jong ka KHADC u bah Titosstarwell Chyne ha ba kren ha kane ka sngi u la ong ba u bah H.S Shylla (bam kwai ha dwar u blei) u long u nongialam u ba rat bah, ym tang ha KHADC hynrei, kum u nongialam jong ka jaidbynriew u ba lah ban pynkhih ia ki paidbah haba u kren.

U bah Titostarweli u la ong ruh ba ha ka jinglong CEM hapoh jong ka KHADC u la wan rah ia ki bills ki ba don kam shisha kum ka Clan Bill, Linage Bill, ia kaba la phah sha u Lat jong ka jylla, hynrei ia kine kine ki Bill ki la wan phai biang.

U la ong ruh ba na ka liang jong ka KHADC ka kwah ban pynurlong ia kaei ka ba u bah HS Shylla u la maitphang. Na ka liang jong u CEM u la pynpaw ba ka jingkhlad noh jong u bah H S Shylla ka dei ka jingduh ka ba khraw ym tang ia ka iing ka sem, ka KHADC hynrei wat ia ka jaidbynriew hi baroh kawei.

Kiwei kiba la kren ha kane ka sngi ban pynpaw ia ka jingsngewsih halor kane jingkhlad jong u bah HS Shylla ki long u bah P N Syiem CEM ba rim, bah Bindo M Lanong, bah R V Lyngdoh bad u bah Victor Ranee, kine baroh ki la pynpaw ia ka jingduh kaba khraw da ka jingkhlad jong u bah H S Shylla.