“Ka seng kan nang pynjur ia ka jing talasi mynder, ym donkam ban pan jingbit na Secreteriat ne na KHADC”

Shillong:Halor ka jing saphiang ka khubor ba ki sengbhalang kim lah ban khynra trading licence ne work permit, mynta ka sngi,  U President ka KSU sengkmie, ula ai ka jubab kaba shai, ha ka jingrakhe lyngkhuh sngi iap ba 184 u paiem Tirot Sing Syiem ha Madan iew rynghep, da kaba u ong “Ki Sengbhalang kim donkam jingbit na u ‘A’ ne u ‘B’ hynrei ka kyrwoh kaba shai sha baroh ki shnat treikam jong ka seng KSU bad ki para sengbhalang kino kino ba shisien ki la phong ia ka uniform jong ka jaitbynriew ki don ka hok ban khynra licence bad ka seng ruh kan pynjur shuh shuh ia ka jing talasi mynder ri ha kylleng ka Ri jong ngi bad ym donkam ka jing pan jingbit na Secretariat ne na KHADC bad kita kiba wohkjat kin shim ka jingkitkhlieh ha lade bad na ka liang ki para dkhot ka seng KSU ruh kin long kiba shynrang ka mynsiem”.

Shuh shuh u ne nongialam rangbah ka Seng KSU u la ong ba ym pat ju don kano Kano ka aiñ ban iada ia ka jingrung kyrthep ki mynder ri, hynrei ka jing nang jyllei ki mynder kiba wan tyllep hapoh ka ri jong ngi kiba wan lyngba ka khaïi pateng ka shongkha khleh bad ki jingioh bsut khlieh lyngba ki kam ki jam ka nang jur.

Ha kane ka sngi la ioh sngew shibun ki nongkren  kum u bah Wilbert Rani, President ka FKJGP sengkmie, u  samla Samuel Jyrwa chairman ka NESU bad  kiwei de ki nongialam kiba kren bad  ki ieng ha ka juh ka sur da ka jing kyntu ba ngin ieid ia ka jaitbynriew kumba long u Tirot sing Syiem bad ki iai ban jur hi ia ki juh ki mat kum ka jing dawa weng ia ki  Khar metor, Uranium bad ki jing dawa ia aiñ kiba khlaiñ ban pyrkhing ia ki mynder. Ha kane ka step ka don  ka jing buh syntiew na ki shnat treikam bapher bapher ka seng KSU bad FKJGP bad ki riew shimet kiba wan don ryngkat  ia ka sngi leh burom ia u syiem uba lonh u Riewshlur ka ri Hynñiewtrep jong ngi.

Ki kyntien ba u Syiem Tirot sing Syiem u ong “Lah ka ban iap kum  paidkar ha byndi ban ia kaba im kum u syiem mraw” kine ki kyntien ki pynshlur ia ka jaitbynriew ba kan dang khih dang ksar ban ialeh laitluit ia ka jingshah thombor ha ki bor banabar haduh kat kine ki sngi ba mynta bad ka ngi iohi ka jaitbynriew ka dang don shibun ki rangdajied ki nishan bad khraw pyrkhat kiba Im sngi ban iada ia ka jingbha ka pateng pakit jong ka jingshñgaiñ  ka jaitbynriew ban ym pyndem tdong ha ia kito kiba thombor ia ngi.