Kynjah ka iew,khang ki dukan ha ka pakhang shnong

Shillong,
16 Rymphang:  
Ki iew ki hat, ki dukan ki la khang lut bad ki kali ki la duna kiba iaid ha ki surok na ka jingkhang shnong ka HNCL mynta ka sngi kaba 12 kynta.   
Ka jingpoi trei ki nongtrei sorkar ka duna bha bad don kiba la duna bha bad don kiba kham biang.
Ha ka nongbah Shillong, ka Iewduh bad ha Khyndailad ka la pjah namar ba ki dukan bad ki iew ki hat ki la khang kdam lut ha kane ka sngi, lait noh tang ki dukan ha ki shnong kiba plie.
Haduh ba thoh ia kane ka khubor, kam shym la don kano kano ka jingjia.
Ki jaka pule, ki la khang lut lait noh tang ka eksamin jong ki khynnah klas XI.
Watla ka sorkar ka la maham ia baroh ki nongtrei ban wan trei ban iamih paidbah ban ialeh pyrshah ia kane ka pakhang shnong ka HNLC hynrei ha ka Main Secretariat bun ki myntri sorkar kim shlan ban wan trei hynne ka sngi.
Ha East Khasi Hills ka jingpoi ki nongtrei sorkar ka la long 75 per cent kumba la iathuh da u Deputy commissioner u Sanjay Goyal. Ha East Jaintia Hills kiba wan trei ka long 84 per cent, katba 82.45 per cent ha West Jaintia Hills, katkum ka khubor sorkar.
Hynrei tang 45 per cent kiba wan trei ha Ri-Bhoi, bad 65 per cent ha West Khasi Hills bad  80 per cent  ha South West Khasi Hills.
Ka eksamin jong ka MBOSE na ka bynta ka klas XI ka la iaid beit khlem kano kano ka jingpynthut. U Goyal u la iathuh ba ha East Khasi Hills,  kam shym la don kano kano ka jingjia ha kine ki kynta pakhang shnong.
Ka HNLC ka la pakhang shnong naduh  ka 5 baje mynstep haduh 5 baje janmiet ha baroh kawei ka Khasi bad  Jaintia Hills.
Bun bah ki nongtrei ha Secretariat ki la pep trei wat hapdeng ka jingpynbna ka sorkar bym dei ban jah trei ha kane ka sngi.
ka HNLC ka la khot ia ka pakhang shnong ban pyrshah ia ka jingshah banbein jong ki Kristan ha New Delhi, ka jingshah banbein jong ki nongniah trok bad ka jingpynslem ban sei madan ia ka kaiphod siat iap ha Mookhep.