Kynjah jlam ka kam pynhap shuki MR ka Congress

Shillong, 31 Jymmang: Ar bnai myn shuwa u myntri rangbah ka jylla u Dr.Mukul Sangma u la kob bad u la kren rangbah ba u long uba kloi ban hiar noh na ka shuki myntri rangbah ka jylla lada jia ba ka Congress ka don da uwei pat u nongialam uba kham tbit ban ia u. U Dr.Mukul u la kren ia kitei ki ktien hadien ba ka jingpynkhih ia ka shuki jong u ka la sdang beh lyer.
Mynta ha kine ki khyndiat sngi hadien ba ka seng Congress ka shah rem kput ha ka elekshon MP shiteng samoi na Tura Parliamentary Konstitwensi, ki MLA bad myntri sorkar na ka seng Congress ki la khih la ksaid tyngeh ban pynhap noh ia u Dr.Mukul na ka shuki myntri rangbah ha kaba katei ka kam ka la poi ruh sha ki tyndong shkor jong ka heh duh katei ka seng ka Sonia Gandhi.
Halor katei ka jingkhih ki MLA Congress haba ia kren bad ki nongthohkhubor u Dr.Mukul u la kren rangbah biang da kaba ong ba kumba u don mynta ha ka shuki myntri rangbah un iai don ruh ha ki por ban sa wan kaba u la kdew shai ba un iai neh kum u myntri rangbah haduh ba kut ka san snem.
Ha kine ki khyndiat sngi ka jingkhih radbah ki MLA bad ki myntri ka sorkar Congress la i kumba yn wan shisha da u myntri rangbah uba thymmai ha kane ka jylla hynrei katei ka jingshongshit wad nongialam thymmai ka la shu dait thah noh noh slam la i pynban kumba ka iahap bad ka ktien kaba ‘u lum u suh khun ,u kha pat da u dkhan’.
Haba buddien bha ia katei ka kam ia khih wad nongialam thymmai ka seng Congress u nongthoh khubor u la ioh jingtip ba kaba kut kan shu long hi tang ka jingiakhih ha kaba la ioh jingtip ba wat la kham ha shuwa. ki la biang nombar ban pynhap ia u Dr.Mukul hynrei kitei ki MLA Congress kiba la don ka jingbun paid kim lah pat ban rai hano ban bynshet ia ka kam nongialam bad don napdeng jong ki mynta kiba la leit phai biang sha u Dr.Mukul. La ioh jingtip ba kumba ka long mynta katei ka kam bujli nongialam ka la dait thah bha bad bun ruh na ki MLA katei ka seng kiba la sdang ngiah ia katei ka jingpynsawa khiew thylli.
Katei ka jingjia hapoh ka seng Congress ka la pynkynmaw ia u nongthohkhubor ia ki kyntien kiba u myntri rangbah u la kren hapoh kine ki ar bnai kiba ngim patlah ban mutdur hato kitei ki ktien jong u kin urlong haduh ba kut ka samoi treikam jong u kaba sah sa tang ar snem duna?.