Kynjah jar, ka riam saw bthuh ki daju ha Iewduh

Shillong,
11 Rymphang:
Ka jingpynphong da ki riam ba shynna ia ki daju Iewduh ka la kynjah jar mynta, watla ki la don bun ki Daju Iewduh kiba la dep ban thied ia kitei ki riam na ka ophis ka Hima Mylliem ha ka dor T.500 tyngka. Ki Daju haduh mynta ki dang set khop ia katei ka putoi sawbthuh kaba shong dor T.500 tyngka bad kim pat sei madan ban phong ha ka kam jong ki. Katei ka mat phong Uniform, ki Daju ka la kylla long ka khana iew khana hat, ka khana lynti syngkien ha kine ki sngi, ha kaba ki paidbah ki ang lyngngoh shano kita ki daju riam saw bthuh ki la jah, namar ba kham mynshuwa ki la iohi shaid ha ki kot khubor ba mynta shi mynta yn sawbthuh ka Iewduh, hynrei haduh kine ki sngi ruh ym pat iohi ia kita ki Daju.
Kham ha shuwa, ka Hima Mylliem ka la pynbna paidbah ba naduh ka 16 tarik u kyllalyngkot 2015 baroh ki Daju Iewduh ki dei ban pynbiang ia ka riam rong sawbthuh bad ki bym shym don ia katei ka riam yn ym shah ba kin kitnong ha iew, bad kham shuwa ia kane ka Hima Mylliem ka la pyllait ia katei ka riam ki Daju da kaba sam sha ki katto katne ki Daju kiba la wan sha ka jingialang pyllait riam, bad ha kajuh katei ka sngi la pynbna ba ka 15 tarik u kyllalyngkot kan dei ka sngi ba khadduh ban sam Uniform bad baroh ki Daju naduh ka 16 tarik ki dei ban pynbiang ia ki Uniform bad lada khlem Uniform yn ym shah kitnong ha Iewduh.
Don napdeng ki daju kiba la dep thied ia ka riam jong ki, bad don pat napdeng jong ki ki ba pyrshah ban phong ia ki riam U Syiem Mylliem, namar ki la ong ba ka rem palat ka dor, bad ka la don ka jingialum ki daju ha ophis ka hima Mylliem khrui ha u bnai ba la dep, ha kaba ki la leit ruh ban ujor sha ka HYC , kaba kham hadien ka HYC ka la leit ban ia kren bad ki myntri ka hima Mylliem.
Hadien katei ka jingiakren hapdeng ka HYC bad Hima Mylliem, ka HYC ka la ong ba ka hima Mylliem ka la weng shipor ia katei ka jingphong Uniform katba ka Hima Mylliem pat ka ong ba kan bat beit ia kiba kit jingkit khlem Uniform, bad hadien katei ka sngi la iohi ba ym pat don u Daju haduh mynta ruh uba phong ia ka riam sawbthuh bad kam pat ju don ruh kano kano ka jingpynthud ia kiba kit khlem Uniform da ka hima Mylliem.
Lah ban kdew ba katei ka jingpynphong riam ia ki Daju ha Iewduh ka dei ka rai kaba ka District Council bad ka hima Mylliem ka la shim ha ka por ba dang long CEM u bah Ardent M Basaiawmoit, bad dang long EM Labour u bah James Ban Basaiawmoit, hynrei haduh mynta ka district council kam pat ai dak la katei ka rai bad ki jingpynbna motphran kin iaid keit ne-em kumba la pynbna, bad la iohi ba ka la mih tang ka jingiakren na ka liang ka hima Mylliem bad ki paidbah ne sengbhalang.