Kynjah jar ka khynra laisen khaiï, bynniaw kiba die jingdie ha Ïewduh

Shillong:Mynta lah da kiba bun tylli ki snem, ym ju ïohsngew shuh kata ka jing khynra laisen khaiï da ka KHADC bad katei ka dei hadien ba la kut noh ka jinglong CEM u Bah Ardent Miller Basaïawmoit, ka jinglong EM Trade u Bah Latiplang Kharkongor bad hadien ba duh noh u MDC ka Jaïaw Constituency ïa ka kam EM Trade u Bah Paul Lyngdoh.

Katei ka dei ka sur kaba bun na ki briew kiba peitbniah ïa ki rukom synshar ki seng Saiñ Hima Sima hapoh KHADC bad khamtam eh kiba bun ki longkmie kiba la kham nohrta kiba die jingdie hapoh Ïewduh haba ïakren bad u nongthoh khubor.

Kane ka jingïohi jong kitei ki briew kiba peitngor bha ïa ki rukom pynïaid kam hapoh KHADC, ka la long ruh ba kin pynpaw ba ki ïohi ba ki don ki Basa hapoh Ïewduh kiba mynshwa kidei kiba shait die ki Khasi, kynthup ruh ki jaka ba shait shongdie madan ki Khasi kiba la ïoh da kiwei ki jaitbynriew bym dei Khasi.

“Ki don mynta ki dukan ba shait die jingdie ne wat ba long trai da ki Khasi, lah ban ong kiba die ja, die soh, die kum ki pla (Bag) kynthei shynrang lada dei hapoh dukan ne madan lah bun kiba shimti da kiwei ki jaitbynriew na rithor kiba ym lah ban tip ki wan naei, ki phriang beit ïa ki jingdie ka haba lap ba shem ne ha kito ki jaka ba shong madan ki Khasi kiba la suba ba ka don ka jingai pateng da kaba siewdor bad ka jingkylli kaba mih ka long la kitei kiba treikam khaiï, kumba la maitphang hapoh ka aiñ Trading by Non Tribal Act, ba kino kino ki briew kiba nabar jylla, la ki leh kino kino ki kam khaïi barit ruh, ki donkam ban shim laisen khaiï, la kitei ki bud ne em ïa ki jingbthah hapoh katei ka aiñ,” ong kiba bun ki nongshong shnong kiba sngewkhia (Concern Citizen) halor ka jingkynjah ka khynra laisen khaiï da ka KHADC.
Lah ban ïohi ba hapoh Ïewduh ki la don shisha ha ki katto katne ki Basa kiba kiwei ki jaitbynriew ki la nang shna ki jingbuh tiar (Furniture) hapoh ki dukan, kiba dei jong ki Khasi ne synteng, kiba la pynkhreh ba leh ki kam khaïi.

“Hato kitei ki la biang ki kot ki sla?, ne ïoh dei ba ki don ka jingïadei bad kino kino ki bor pynïaid ne trai dukan ban ïoh da kaba suk ïa ki jingdonkam kaba kidei ban leh,” kren bynñiaw shuh shuh katto katne kiba shong dukan hapoh Ïewduh hadien ba ki la ïohi ba kane ka jingai pateng ïa ka bhah la jong kan long kumba pynïeng ïa ka jaitbynriew ha tmier jong ka riat.
Lah ruh ban pynkynmaw ha ki snem ba lah leit noh ka KHADC hadien ka jingïoh thiah kaba da ki phew snem, ha kaba bun na ki riewshemphang ki la ong ba bha ban pynduh noh, hynrei ka la paw biang lyngba ki kam khynra laisen khaiï ha kitei ki snem bad bun ruh kiba ong ba lada kan synshar tang 5 snem la khuid ka Ïewduh bad kumba long mynta pat kitei ki la shu sah tang ki jingkynmaw bad don ruh napdeng ki riew pawkhmat ne Concern Citizen kiba la thoh biang ban ong ba ka jingtreikam ka District Council kumba long mynta lah bha ban pynduh pyndam noh.