Shillong: Ka jingialang ka kynhun na Meghalaya ba la ialam da u myntri rangbah u Conrad K Sangma bad ka seng ki nongkhaïi ka Chambers of Commerce ha Sylhet, Bangladesh ka la long kaba don jingkyrmen ban kyntiew ia ka jingiadei hapdeng ki ar liang mamla.
Ha kane ka jingiakynduh u myntri rangbah ba la synran lang u myntri sorkar bah Lahkmen Rymbui, bah Sniawbhalang Dhar, bah Banteidor Lyngdoh bad ki ophisar, ki nongkhaïi ki la khot sngewbha ruh ia ki dkhot ka Chambers of Commerce, Sylhet ban wan jngoh sha Meghalaya. Kane ka kynhun ka la mih ha kane ka 5 tarik bad kan iaid da ka surok naduh Dawki sha Sylhet, sha Dhaka bad na Dhaka sha Mynmensing sha Tura haduh ka 8 tarik.
Ka nongbah Dhaka ka jngai tang kumba 3 kynta shiteng na Meghalaya bad tang 45 km ka Sylhet na Dawki, kan dei ka jaka kaba jan bha ban leit ban wan hapdeng kine ki ar liang mamla ban kyntiew ia ka kam khaïi pateng.
La iakren ruh ha kane ka jingialang ban shna ia ka surok ne ka lynti ka syngkieng kaban pyniasoh ia ka Sylhet bad ka Shillong lyngba ka jingiatreilang ka sorkar pdeng jong kine ki ri.
Ha kajuh ka por, u myntri rangbah u la pynpaw ia ka jingsngew kmen ban leit jngoh ia ka Jaintiapur ha kaba ki dak ki shin ka hyndai ki dang don jong u syiem Jaintia. U la iakynduh ruh ia ki Khasi-Pnar kiba sah ha katei ka thain. U la kyntu ia ka sorkar India bad sorkar Bangladesh ban iarap ban iada bad ban pynneh kyrpang ia kane ka jaka Jaintiapur kaba don ki khana ba riew spah. Ki MLA ka Jaintia ki sngew kmen ban ioh leit jngoh ia katei ka jaka bad ki sngew sarong ba kane ka dei ka sorkar kaba nyngkong ban leit jngoh ia katei ka jaka.
U myntri rangbah u la ong ba ka daw ba kane ka sorkar ka leit jngoh ka long ban tei ia ka jingiadei kaba iajan bad ban ioh sngew ia ki jingsngew jong ki briew katei ka ri. La iathuh ba na ka 10 billion dollar ki kam khaïi ha Bangladesh, ka Meghalaya ka noh synniang 0.7% ha ka khaïi pateng ha kaba ka Meghalaya ka don u pud ba jrong 443km bad ka Bangladesh.
Kane ka sorkar ka thrang ruh ban kyntiew ia ka kam jngohkai namar ba ka Bangladesh ka dei kawei kaba noh synniang bha ha kane ka liang namar ka jingitynnad ka jylla Meghalaya bad kumjuh ka pule dangle ka dei kawei kaban khring ia ki samla na ri Bangladesh.
Phi don ban ong eiei?