Kynduh Myntri sorkar ki nongialam ka Synjuk Phra Shnong ka thain Nongpoh

Nongpoh: Myn hynnin ka sngi ki nongialam ka Synjuk ki Phra Shnong, kiba don ha ka thain Nongpoh, ki la leit ban kynduh ia u Bah Hamlet Dohling, Myntri ki kam pynroi sor (Urban), kata ka long ban leit pynsngew biang ia u halor ka jingdawa ka jong ki ban weng noh ia kitei ki 8 tylli ki shnong napoh ka thup Urban.

Kitei ki 8 shnong ki kynthup kiba la dawa na ka sorkar ban weng noh na ka jingshah kynthup ha Urban, ki kynthup ia ka shnong Umryngksai, Umlyngkdait, Lumbyrhing, Pahamrioh Lum, Pahamrioh Them, Shangbangla, Umskun bad ka Umshangling, kiba dei ruh ki shnong kiba don hajan eh bad ka Nongpoh, hynrei ki dei pat ki shnong kiba dang don hapoh shibun ki jingduna haba iadei bad ki kam pynroi ha ki shnong ki thaw.

Ha katei ka jingleit kynduh Myntri sorkar, na katei ka Synjuk ki Phra Shnong, la lamkhmat da u Bah Donbok Kharshandi, Chairman, nangta u u Bah Elfin Umlong, Secretary bad u Bah K. Suting, Rangbah Shnong ka Pahamrioh, kumta ha katei ka jingleit kynduh ka jong ki, nalor ka jingiakren bad pynsngew halor ka jingbymiahap ban kynthup hapoh ka Urban ia kitei ki shnong, ki nongialam katei ka synjuk ki la phah ruh da ka jingthoh sha utei u Myntri ka sorkar jylla.

Haba kren sha ki lad pathaikhubor, u u Bah Donbok Kharshandi, u la ong ba ka daw hi kaba la pynlong ia ki 8 tylli ki shnong ban kyrpad weng noh na ka thup Urban, ka dei namar ba bun ki paidbah nongshong shnong ha kine ki shnong ki dang dei tang ki nongrep kiba ju im kamai jakpoh da ki kam rep kam riang bad kiba dei ruh na ki longiing baduk ba rangli, kumta ka jingshah kynthup kine ki shnong ha katei ka thup ka la wanrah ia ka jingduhnong kaba khraw ia kitei ki shnong, namar bun ki skim kaba ki dei ban ioh pynban ki la duh noh.
Na ka sur kaba la mih na kitei ki nongialam, la sngewthuh ba utei u Myntri sorkar, u la ong ba un sa shimkhia ban pynurlong ia katei ka jingdawa ka jong ki bad halor kata ki la ong ruh, ba utei u Myntri un sa bishar bha shwa ia ki kot ki sla halor ka jinglong jingman hapoh kitei ki 8 tylli ki shnong kiba don ha ka thain Nongpoh.