Kynduh mawsiang ka tnad rep, haba ia dei bad ka rep synsar

Shillong, 6 Naiwieng:
Ka rep synsar ka la dei kawei ka jingrep kaba la kloi eh ban ai jingmyntoi ia ki nongrep, khamtam ia ki paidbah ha ki nongkyndong bad kane ka jingrep ia u synsar ha poh kane ka jylla kam pat dei kaba la slem ka dang long mynta hapoh ki 30 snem.
Mynshuwa jong u snem 1980 ki briew ki juh leit ban phut synsar na ki khlaw khlem da rep ia u namar u mih hi ha ki khlaw ki btap, hynrei ha dien jong u snem 1980 kala sdang ka jingrep ia u synsar bad kane ka long sdang na Pynursla Block bad bud sha ki thain Mawsynram Block bad mynta ka la poi sha baroh kawei ka jylla.
Ka la don ruh ka jingiakren hapoh iing dorbar thawain jong ka jylla ban dawa na ka sorkar ba dei ban ithuh noh ia une u jingthung kum u mar rep namar la bun ki paidbah ki la rep ia u ban in ja kpoh bad ban pynneh pynsan ia ki khun ki kti ban pynnang pynstad ia la ki khun ki kti jong ki namar ka jingrep ia une u jingthung ka long ba tang mar shisnem la lah ban ioh jingmyntoi.
Hynrei haba phai pat sha ka tnad sorkar kaba dei peit ia ka rep ka riang mynta ka don hapdeng ka jingeh kaba khraw kumno ban pynsngewthuh ia ki paidbah ba kane ka rep synsar kan sa pynduh ia ka jingsboh jong ka khyndew, hynrei kam don da kiwei pat ki lynti ban pynsngewthuh ia ki nongrep ba kin kiar ka rep synsar bad shi ia ka rep kaba kane ka tnad sorkar kan hikai.
Ki thymmei khubor kiba u SP News Agency u la ioh la ong ba ka tnad rep jong ka sorkar mynta ka don ha ka jingeh kaba khraw kumno ban pynshai paidbah ha lor ka jingsniew jong ka rep synsar namar ka ktah ia ka khyndew bad shisien ba la rep ia u nong u jingthung la shem jingeh ba kiwei ki jait jingthung kin im.
Dei na ka jingiohi jngai jong ka tnad rep ba ia u synsar haduh mynta ym shym la ithuh kum u mar rep la iathuh ia u kum u mar khlaw namar ka rep synsar kan ktah ia ka mariang bad kum juh ia kium ki kwah, hynrei ka long kaba eh pat ban pynduh ia kane ka rukom rep dei ha kane ka bynta kaba tand rep ia ka kynduh mawsiang kumno ban rep ha kaba ia dei bad kane ka rep synsar.(SP News Agency)