Kynduh mawsiang ka PHE ban pyniaid paip na

Jaiaw bad Mawlai
Shillong, 31 K’lyngkot:
Ka tnad PHE ka la iakynduh mawsiang ban pyniaid ia ki paip ban sam jong ka Greater Shillong Water Supply Scheme (GSWSS) Phase III ha ki katto katne ki bynta jong ka Jaiaw bad la jan baroh ki dong ha Mawlai.
Ka daw ka long ba ki shnong kim ai bor ne permishon ia ka tnad ban tih paip ha ki katto katne ki dong ha Jaiaw bad la jan baroh ha Mawlai, la ong u heh ka tnad PHE. Tang ha ki katto katne ki jaka lah ban pyndep ia ka jingbuh paip ha ka thain Jaiaw.
U la ong ba ka Dorbar Shnong ha kiba bun ki dong ha Mawlai kim shym la kren shai ia ka daw ba kim ai permishon ban buh ia ki paip.
Ha ka jingshisha, ka tnad ka la buh thong ban pyndep ia kane ka kam hapoh u bnai Lber mynta u snem.
Namar ka jingujor na ki dong bapher bapher, u heh ka PHE u la ong ba baroh ki jaka ba tih ban buh paip la pyndep khyndew noh kumto kumto hi ban lait na ka jingpynwit ia ki paidbah.
“Ngin ialeh tyngeh ban pyndep katkum ka por khnang ban lait na ka jingpynkiew dor thymmai namar ka jingslem” la ong une u heh.
Hadien ba la pyndep ia ka Stage-III, yn lah ban sam um 24 million litreshi sngi bad yn ioh um 135 litre shi khlieh ha ka shi sngi ka um dih na ka bynta 5,12,000 ngut ki nongshong shnong ka sor Shillong. Ka Stage-I bad II ka ai um tang 85 litre shi sngi shi khlieh briew ka umdih ha ka nongbah.