Kynduh ki RBYF ia ki nongialam shnong ka Raid Nongtung, rai ban iakhih lada pynkhein kular ka sorkar

Nongpoh: Mynhynnin ka sngi ki heh nongialam ka Ri Bhoi Youth Federation (RBYF), ki la pynlong ia kawei ka jingialang bad ki nongialam na ki shnong bapher bapher kiba hap hapoh ka Raid Nongtung bad katei ka jingialang, ka long na ka bynta ban iakren bad iathir halor ka jingthmu hapdeng ka sorkar Meghalaya bad Assam ban sdang noh ia ka jingpynbeit pud ha katei ka thain.

Ha katei ka jingialang kaba ki la pynlong ha Mawlasnai, ka jingiakren hapdeng kitei ki nongialam ka RBYF bad nongialam shnong ha katei ka thain Block-2, ki la pynmih ia ka sur ba baroh ki shnong Khasi kiba don ha katei ka thain, ba ki dei ban hap beit ha Meghalaya hadien kane ka jingpynbeit pud jong ka wat ba-ar.

Katei ka jingialang, ka la neh bun bun kynta hapdeng kitei ki nongialam jong ka RBYF bad kite ki nongialam shnong, ha kaba ki la shim ia ka rai ba baroh ki shnong Khasi kiba don ha katei ka thain ba ki dei ban hap beit ha Meghalaya, kata ka long katkum ki jingshisha, lada ka long ha ka jingkhein lyngba ki khana mynbarim ne na ka jingdon ki paidbah.

U Bah Bipul Thangkhiew, u la ong ba ha kane ka wat ba-ar jong ka jingpynbiet pud hapdeng ka Meghalaya bad Assam bad khamtam ha ka Raid Nongtung bad kaba la tip kum ka Block-2, kam dei ban bakla bad kata ka long ba ki ar Myntri Rangbah, ki dei ban sngap beit ia ka sur u paidbah kiba sah ha katei ka thain bad lada bakla ia kata, ka seng kam banse ban shim da ki lad jingiakhih bad lada donkam, ka seng kan sa shim ia ki sienjam kiba tyngeh.

Katba u Bah Blikshon Sohtun, u la ong ba um kwah ba ha kane ka kynti kaba mynta, ba ka jingpynbeit pud hapdeng ka Meghalaya bad Assm ha Block-2, ka dei ban long ha ka por mynsngi mynshai bad ban sngap ia ka sur u paidbah na katei ka thain, ym ban jurip ha ka por mynmiet, ba ym don paidbah shuh.

Shuh shuh, u Bah Blikshon Sohtun, u la ong ruh ba ha ka jingleit kynduh jong ki ia u Conrad K. Sangma, Myntri Rangbah ka sorkar jylla, ki la mih da ka jingkmen na ka kamra jong u, kata hadien ba ki la iohsngew ia ka sur na u, ba u la ong ba baroh ki shnong Khasi kiba don ha katei ka thain, ba kin hap beit hapoh u pud u sam ka Meghalaya, hynrei kaba la pynnoh mynsiem ia kitei ki nongialam shnong, ka dei hadien ba ki la ioh jingtip ba katei ka jingkren u Conrad K. Sangma kam iahap bad na kaei kaba ki la ioh jingtip.

Ha ka jingiakren jingngi bad u Conrad K Sangma, u la pynpaw ba un shim ia kane ka jingpynbiet pud na kaei kaba la leh da ka sorkar barim bad kaba ki iakren bad u Dr. Mukul Sangma ha u snem 2011, ha kaba ka la pynpaw shai kdar ba baroh kitei ki shnong ha Block-2, ki la hap ha Meghalaya, hynrei kaba ngi sngewsih, ka dei hadien ba ngi la ioh jingtip, ba ki don tang tang 4 tylli ki shnong ki shnong kiba hap ha Meghalaya bad kaba la pynsngewsih eh iangi, ong u Bah Blikshon Sohtun.

Kumta haba iadei bad kitei ki jingkulmar kaba ki paidbah khappud ki la mad, na ka liang kitei ki nongialam shnong na katei ka thain, ki la buh ia ka jingkyrpad ia ka sorkar jylla, ba baroh kitei ki shnong khappud bad kiba dei ki shnong Khasi ba ki dei ban hap beit sha Meghalaya, u la bynrap.