Kynduh ka SNSBH ba tyrkhong um ka sor, naba bthei u nar PHE

Shillong, 04 Iaiong:
Ka jingbthei ki paip um ha ka janmiet jong ka 3 tarik u Iaiong ha Mawkriah ki la pynkyrduh um ia ka nongbah Shillong bad kumjuh sha ki shnong ba markhap bad ka nongbah. Halor kane, ki nongialam ka Synjuk ki Nongsynshar Shnong ka Bri U Hynniewtrep (SNSBH) hynne kila leit peit da la ki jong ki khmat ha kane ka jaka ha ka jingialam u Bah R Blah u ba dei u Secretary bad ka la iakynduh ia u Executive Engineer ka Public Health Engineering Division II u Bah Samuel Kharmawphlang bad ioh ban iakren bad u ha lor kane ka bynta.
U Bah Kharmawphlang u la iathuh ha ki nongsynshar shnong ba ka jingbthei ki paip um ka dei ba ki paip ki la rim palat bad ka rta jong ki ka la poi sha ka 30 snem tam.
“Ka jingiapynbeit hapdeng ka tnad PHE bad ka kompeni kaba pyntrei ia ka 2-lane (Sohiong By-Pass) ka don hynrei ka lah ruh ban long ba jingtheh khyndew ha kane ka bynta ka la pynkhia bad pynlong ia ki paip ba kin bthei”, la ong u Bah Samuel.
Ki paip ki dei ki 750 mm bad ym lah ban ong ba ka jingpyllait palat ia ka um kan palat ia ka 750 mm namar ia ka jingpyllait ia ka um la leh da kawei ka bynta.
Ka Synjuk ka la pynpaw ia ka jingai khublei ia ka tnad PHE kaba la shim khia ban maramot ia kane ka jingbthei jong ki pipe bad pyniaid shaid shaid ia ka kam. La iohi ruh ba ki nongtrei ba kynthup ia u Executive Engineer, u SDO bad kiwei kiwei ki la ia shim bynta ban iatrei lang khlem shongthait naduh ka janmiet 3 tarik ban pynthikna baka jingtrei dei ban pyndep mynta ka sngi ka 5 tarik u Iaiong khnang ba ki paidbah kiba shaniah tylli ha ka tnad PHE na ka bynta umbam umdih kin ym don jingthut.