Kynduh ka BJYM ia U Rijiju

Shillong, 09 Nailar:
Ka BJYM (BJP Youth Wing) Meghalaya  ka la iakynduh ia u myntri khynnah ba peit ia ka tnad kam pohiing ka ri u Kiren Rijiju ha New Delhi ban dawa na u ban pynsynjor ia kyndon kaba iadei bad ka jingjrong ne rynieng ia ki samla Khasi khnang ba kin ioh rung kam ha ka tnad shipai ka ri.
Haba pyllait khubor halor kane, u President ka BJYM u Bah Egenstar Kurkalang uba ialam ban iakynduh ia u Rijiju ha New Delhi, u la ong ba ka seng ka la pynsngew ha u myntri ia ka jingeh jong ki samla na kane ka jylla Meghalaya ban ioh rung kam ha ka tnad shipai kari tang namar ka jinglynkot ka rynieng, wat la ka bor jabieng bad ka bor jongki, ka long kaba biang bha.
Katkum ka jingpynsngew ha u myntri ka sorkar pdeng, u Bah Kurkalang u la ong ki samla ka jylla ki la ud ia ki nongialam ka BJYM ha kaba ha ka jingpynrung kam ka Assam Riffle, Assam Regiment bad ka 58 GTC ha Shillong kiba bun bah ki la shah kyntait tang namar ba ki duna rynieng hynrei ha ka bor met bad ka bor pyrkhat ki lah ban kham tbit shibun ia kiwei pat.
Halor kane, na ka liang ka BJYM  ka la aiti ia ka jingthoh ha u myntri bad kyrpad ba un tuklar lem ia kane ka jingeh jong ki samla ka jylla da kaba pynmih kyndon ba kyrpang ia ki samla kane ka jylla khnang ba kin lah ban ioh rung kam shipai bad kin ioh ruh ia ka lad ban shakri ia ka ri.
“U Myntri u la kular ba un pyrshang ban leh ia kane kam katba lah”, la ong u Bah Kurkalang.