Shillong: Ki nongmihkhmat ka All Meghalaya SSA School Teachers’ Association (AMSSASTA) hapoh ka jingialam jong U babu L. Marngar kum u President, bad babu D. Lamare kum u General Secretary ki la leit ban iakynduh ia u State Project Director (SPD) u Ambrose Marak myn ha ka 20 tarik mynta u bnai ban iakren bad ban wad jingtip ha kaba iadei bad ka arrear kaba phra bnai kaba dang sahteng ha kaba iadei bad kane na ka liang u bah Marak u la iathuh ba ia ka arrear kaba sahteng ka sorkar kan ialeh katba lah ban siew noh namar ka dei ka hok jong ki nonghikai.
Kumjuh ruh na ka liang ka seng ka wad jingtip ruh ha kaba iadei bad ka khubor kaba la mih ha kine ki sngi kaba ka sorkar kan pyntreikam ia ka Education Policy ba la pynmih da ka School Association ba ka sorkar kam don jingthmu ban ithuh noh ia ki nonghikai SSA kum ki nonghikai bapura jong ka sorkar (regularize), kaba la pynlong ia ki nonghikai ban don hapdeng ka jingkulmar jingmut kaba khraw. Na ka liang u SPD u la ong ba ki nonghikai kim dei ban sngewthuh bakla ia kane, ka sorkar ka don ia ka Education Policy, ym sa leh ia kaba dei ban leh hadien ba la pyntreikam ia ka Policy katba ia mynta ym pat lah ban leh na ka daw ba ka Education Policy ym pat pyntreikam namar ka dang dei tang ka draft ym ka Policy bapura. Shuh shuh u la ong ba ka Education Policy kan dei ia baroh ki nonghikai kiba don ha ka jylla ym tang jong kawei ka kynhun nonghikai ne tang jong ki nonghikai SSA. Na ka liang jong u SPD u la ong ba ka MTET kan nym long compulsory ia ki nonghikai kiba la lah thung shuwa ka 23 tarik Nailar 2010 kane ka long katkum ka NCTE norms.
Ha kane ka sngi ka Association ka la leit ban iakynduh ia u State Zonal Officer ka NIOS ban wad jingtip ha kaba iadei bad ka 4th Semester examination jong ki 2nd batch D.El.Ed trainees (offline) kaba la pynsangeh biang shipor ia ka examination kaba la dep pynbna tarik namar ki daw kibym shym la pynpaw shai da ka bor ba halor jong ka NIOS. Hynrei na ka liang I Bah Pde I la iathuh ba ki nonghikai ki dei ban long kiba la pynkhreh ban thoh ia ki exam jong ki la ha kano kano ka por, bad ia ka tarik yn sa pynbna shen ha kine ki sngi. Ha kaba iadei bad ka jingbakla ha ka jingai marks ia ki katto katne ki nonghikai (1st batch offline D.El.Ed trainees) na ka liang ka NIOS ka dang pyrshang ban pynbeit bad ia kane yn sa pyndep kloi katba lah. Kumjuh ruh kito kiba dang ap ia ki orginal Marksheet na ka liang u Zonal Officer u la iathuh ba la dep ban report sha ka Regional Office ban leh ia kaba donkam.
Ka AMSSASTA ka kwah ban ai khublei ia baroh kito ki nonghikai kiba la pass ha kane ka 4th Semester kaba long ruh ka Exam kaba khatduh jong ka D.El.Ed examination (online) kaba dang shu pynbna dangshen da ka NIOS.
Phi don ban ong eiei?