Kynduh heh MeECL ka HNYF ba thut eh ka bording, byrngem khang lada iai thut ka bording

Nongpoh: Mynhynnin ka sngi, ki nongialam ki nongialam ka Hynniewtrep National Youth Front (HNYF), ki la leit ban kynduh ia u SDO bad Engineer ka MeECL, ban kyntu ia ki ba ki dei ban shimkhia halor ka jinglip bording ba khah khah ha kiba bun ki shnong ha Ri Bhoi, kaba la pynjynjar bad pyn syllang eh ia kiba bun ki paidbah.

Haba leit ban kynduh ia kitei ki heh ka MeECL ha Nongpoh, la donlang da u Bah Donroy Kshiar, Asst General Secretary ka HNYF ha Ri Bhoi, nangta u Bah Shiningstar Suting, President ka 20mer Circle lem bad kiwei, ha kaba lyngba katei ka jingleit kynduh, ki la dawa na kitei ki heh ka MeECL ba ki dei ban pynbiang noh mardor ia ka bording ha Ri Bhoi, namar ba ki paidbah ki la bitar eh na kane ka jingthut ka bording.

Ki la pynmih ruh ia ka sur, ba lada ka MeECL kam lah ban pynbiang thikna ia ka bording nangne shakhmat, ka seng kam banse ban shim ia kiwei ki sienjam kiba kham tyngeh ne wat ban khang tala syndon ia ka ophisa treikam ka MeECL kaba don ha Nongpoh, khnang ban pynpei shkor ia ka MeECL bad ia ka sorkar ruh kumjuh. Na ka liang u Bah Donroy Kshiar, u la ong ba ka seng ka dawa na ka sorkar jylla bad kumjuh ruh ia u myntri ba dei peit ia ki kam bording, ba u dei ban pynurlong ia uta u 132 KV ha Nongpoh, khnang ba ki paidbah kin lait na ka jingshah pynthut na ka jinglip ba khah khah ka bording.