Kynduh heh CSF ka KSU, ba jur ka rung tuh ki khar Bangla ha Shella

Shillong,11 Jymmang:
Namar ka jingrung tuh ki khar Bangladesh kaba khah khah shapoh u pud u sam ka India lyngba ki khapud kiba don ha ki thaiñ Shella, Nongtrai-Ryngku kaba la buh jingeh ia ki paodbah nongrep namar ka jingshah tuh ki mar-rep kiba na ka por sha ka por ka Khasi Students’ Union (KSU) Lawbah Border Area Circle mynta ka sngi ka la leit ia kynduh ia u DIG bad u Area Commandant ka Border Security Force (BSF) ha 123 Area Commandant Office ha Mawpat, Shillong ban ia kren ia katei ka kam.
U President ka KSU Lawbah Border Area Circle, u samla Truelywell Lyngdoh bad u President ka KSU Nongtrai Unit u samla Wanbok Reenborne bad jingsynran u Assistant General Secretary ka KSU Sengkmie ki la leit ban ia kynduh ia ki heh shipai BSF bad ba nai ruh da ka jingthoh ba ki dei ban pyrkhing bha ia ka jingwan rung tuh ki khar Bangladesh kiba ju rah da ki wait ki sdie bad kiwei pat ki tiar pynmynsaw ha ka por ba ki wan tuh ia ki kwai ki tympew , ki soh bad kiwei pat ki jingthung bad katei ka buh jingma ia ki nongrep. Ki heh BSF ki la kular ban shimkhia hynrei ki la ong pat ba ki donkam ia ka jingiatreilang ki trai shnong ba ka jingiada ha khappud kan long kaba khlaiñ.