Nongpoh: Ki nongialam ka KSU bad FKJGP, myn hynnin ka sngi ki la leit ban kynduh ia ka Kong RM Kurbah, Deputy Commissioner ka Ri Bhoi, na ka bynta ban pynpaw ia ka jingpyrshah halor ka jingthmu shim jaka ki shipai ha ka thain Umtyrnga.
Ki dkhot ka KSU, FKJGP lem bad ki katto katne ki briew kiba la leit kynduh DC Ri Bhoi halor ka jingthmu shim jaka ki shipai ha ki thain Umtyrnga
Hadien katei ka jingleit kynduh DC, u Samla Ferdynald Kharkamni, President ka KSU, North Khasi Hills District, u la ong ba ka seng hi ka pynpaw ia ka jingpyrshah halor katei ka jingthmu shim jaka ki shipai ha katei ka thai bad da kaba ong ruh da ka long ha kano kano ka rukom ruh kum ka seng kam lah ban pdiang.
U la ong ruh ka daw kaba la pynlong ia ka seng ba kan pyrshah, ka dei halor ka jinghuri hura ha ki kam jaka puta ha kaba haduh mynta ka seng kam pat ioh thikna ia ka jingtip ia ki trai jaka ba shisha bad kumba la ujor da ki paidbah kane ka lah ban ktah ruh ia ka jaka jong kiwei kiba ym don mon ban die sha ki Shipai.
Hadien kane ka jingkynduh DC, na ka liang ka seng ha ryngkat bad ka FKJGP, ngi la buh ia ka jingkyrpad ia ka DC ba kam dei ban shah ban rigieter ia ki jaka ki puta ha kitei ki jaka ba thmu shim jaka ki shipai, katba ym pat lah ban pynbeit, namar kat kum ka jingtip ka seng la ong ba ki don ki jaka kiba la tyrwa die, hynrei ki trai jaka kiba dei hok kim don jingtip ei ei ruh em, u la bynrap.
Ha kawei pat ka liang, ha kane kajuh hi ka sngi, ka KSU, ka FKJGP lem bad ka HNYF, ki la iakren ruh bad ka DC haba iadei bad ka jingpynslem ha ka ban tei noh ia ka Entry Point ha Ri Bhoi.