Kynduh DC ka JAC, ban pyrshah ia ka jingthaw surok ka Assam sha Nongwah Mawtamur

Nongpoh:Ban pyrshah jur halor ki kam kyntur pud ka Assam ha Nongwah Maw tamur bad kaba la thmu ban pynpoi surok haduh ka shnong Nongwah Mawtamur, ka shnong ha Ri Bhoi bad kaba hap ha Hima Sohiong, mynhynnin ka sngi ki nongialam ka Joint Action Committee (JAC) ki khun ki hajar ka Hima Sohiong, ki la leit ban phah jingthoh bad kynduh ruh ia u Deputy Commissioner ka Ri Bhoi, na ka bynta ban kyntu ia u ba u dei ban shimkhia bad tuklar lem halor katei ka kam kyntur pud ka Assam.

Hadien ba la dep ban buh jingthoh bad kynduh ruh ia u DC, u Bah Purningstar Shabong, Chairman ka JAC, ha ryngkat ka jingdon u Bah Marchkupar Thabah, Secretary ka JAC lem bad ki riew rangbah na ka shnong Mawtamur, ki la pynpaw ba ki pyrshah eh halor katei ka jingwan kyntur pud ka Assam, namar ka don ka surok na Assam bad kaba la shna naduh u snem 2021 bad mynta ka jan poi syndon ha katei ka shnong, ia kaba ki paidbah na katei ka shnong ki pyrshah eh.

U Bah Purningstar Shabong, u la ong ruh ba tang mar ia tip halor katei ka jingwantei surok ka sorkar Assam sha katei ka jaka, ki la leit ban jurip, hadien kata pat, ki la leit ban ujor sha ka sorkar jylla kumjuh ruh sha KHADC, hynrei ka Assam kam shym la sangeh satia bad kaba la pynsngewkhia eh ia ki, ka dei hadien ba ki la iohi bad lap ba katei ka surok ka la dep bad mynta lei ka la poi syndon hapoh ka shnong Nongwah Mawtamur.
Haba iadei bad katei ka jingleit ban kynduh ia u DC, u Bah Purningstar Shabong, u la ong ba na ka liang ka JAC, ka la ioh ban pynsngew sha u DC bad kiba la kyntu ruh ia u DC ba u dei ban tuklar halor katei ka kam wan kyntur jaka da ka sorkar Assam, namar ka la pynsyier ia ki paidbah kiba shong ha katei ka shnong bad katno tam ia kito kiba hap leit trei sha ki lyngkha bad kiba hap kam lyngba katei ka surok.

Na ka liang ka JAC, ka kyntu ruh ia u DC ba u dei ban phah pynsangeh syndon ia katei ka jingpyntrei ia ka surok bad ha kajuh ruh ka por, ki la kyntu ia u DC ba u dei ban phah ia ki bor pahara sha katei ka shnong, khnang ban lait na kino kino ki huri hura bad ba ki paidbah ba kin shong hapdeng ka shongsuk shongsain, namar ka JAC kam kwah ban mih ki huri hura ne ki ban wanrah ia ki jingjia ba sngewsih kumba jia dangshen ha shnong Mukroh.