Kynduh DC ka BBASU, ba siew khajna ia ki mar ba la dep siew

Nongpoh, 08 Naiwieng:
Ka kynhun ki nongshalan mar ha ki thain Byrnihat ha ryngkat ka Border Meghalaya bad Assam, hapoh ka lama jong ka Byrnihat Border Area Stockiest Union (BBASU), mynta ka sngi ki la leit ban iakynduh ia u Deputy Commissioner ka Ri Bhoi, ban iakren halor ka jingeh kaba ki iakynduh namar ba ki hap ban siew biang ka khajna sha ka sorkar ka sorkar jylla, ha ka jaka khrong khajna ba thymmai ka sorkar kaba don ha 13Mer.
Kumban shu ong hangne, ka kynhun ki nongshalan mar ha ka thain Byrnihat, kiba ju shalan dewiong, shyiap, maw lem bad kiwei kiwei de ki jait mar, ki hap ban buh ia kitei ki mar ha ki jaka ba la hap hapoh ka Assam, ha kaba ia kitei ki mar ba ki kit ki la dep ban siew ia ka khajna naduh mynshwa ha ka jaka khrong khajna ba don ha Umling, hynrei kitei ki nongshalan mar ki pynpaw pat ia ka jingsngewkhia kaba jur, namar ba mynta pat ki hap ban siew biang ia ka khajna ha ka Weigh Bridge ba thymmai kaba don ha 13Mer. Dei namar ba ki hap ban siew khajna ha ki ar jaka kaba pynlong ia ka BBASU, ba kan hap ban pynpaw ia ka jingpyrshah kaba jur haduh ba kin da leit ban iakynduh ia u DC ka Ri Bhoi, ba un tuklar halor katei ka jingeh kaba la iakynduh da ki nongshalan mar ha katei ka thain Byrnihat.
Haba iakren bad ki nongthohkhubor hadien ba ki la dep ban kynduh DC, na ka liang u Bah Jeslin Syngkli, President ka BBASU, u la ong ba haba iadei bad kane ka jingeh kaba ki la iakynduh, ka synjuk ki nongshalan mar ki la leit ruh ban iakynduh ia u Superintendent of Taxes, hynrei namar ka jingbym leh ei ei kaba pynlong ia ki ban kin hap ban iaid sha ki bor ba kham halor.
U la ong ruh ba ka long shisha ka jingduhnong kaba khraw ia ngi kum ki nongshalan mar ha ki thain Byrnihat, namar ba ngi hap ban siew khajna ha kajuh ka tnat sorkar ha ki ar jaka ar jaka, namar mynshwa ngi la dep ban siew ha Umling, hynrei mynta ngi hap ban siew biang sa shisien ha 13Mer, la bynrap u Bah Jeslin Syngkli. Haba iadei bad kane ka jingeh kaba la iakynduh da ki nongshalan mar lem bad ki paidbah ha ka thain Byrnihat, hadien ba la buh ia ka jaka khrong khajna ha 13 Mer, na ka liang u DC ka Ri Bhoi, u la kular ba un shimkhia na ka bynta ban iakren bad u Commissioner of taxes bad sorkar jylla, u la bynrap.