Kynduh CEM ki nongialam ka SRSRBD, ban iakren halor shibun ki mat jong ka jaitbynriew

Nongpoh: Mynta ka sngi ki nongialam jong ka Synjuk ki Rangbah Shnong Ri-Bhoi District, ki la leit ban kynduh syndon ïa u CEM ka District Council u Bah T.W Chyne ban ïakren halor ka jingkhanglad ka District Council ïaki Rangbah Shnong ban shim bynta haka kam saiñ hima sima, ha kaba kum ki Rangbah Shnong ki dap da ka jingsngewkhia halor katei ka bynta.

Haba iadei bad katei ka jingleit kynduh ia u TW Chyne, CEM ka KHADC, u Bah PB Sylliang, General Secretary, ha ryngkat ka jingdon Bah BB Makdoh Chairman lem bad kiwei, ki la ong ba ka Synjuk kala pynpaw ka jingsngewkhia hadien ka jingpynmih rai jong ka District Council ban khanglad ïaki Rangbah Shnong ban shim bynta haka kam saiñ hima sima, namar kum ka kynhun ki Rangbah Shnong kala pynpaw ba ka District Council ka dei ban sngewthuh katkum ka jingïaid jong ka por namar ki Rangbah Shnong ki don ka bynta ban wanrah ïaka roi ka paw haka shnong ka thaw.

Shuh shuh, u la ong ruh, ba lyngba katei ka jingleit ban kynduh ia u CEM, u la ong ba ki nongialam ka SRSRBD, ki la ioh ban pynsngew halor shibun ki mat kiba donkam, kiba kynthup halor ka jingkhanglad ïa ki Rangbah Shnong ba kin shim bynta ka ki kam sain hima sima, nangta ka rukom ban ai dulir na ka KHADC bad halor ka jingioh long Rangbah shnong da ki Garo ha ki shnong Khasi.

Lyngba jong katei ka jingkynduh ia u CEM, ngi la ioh ban pynsngew sha u CEM halor ka jingrem ka bai register khyndew, bad naka liang ka u CEM u la pynshai ruh ba ka District Council kala shna ruh ïaka Land Bill, bad ha kane ka Land Bill naka liang ki shnong kiba hap hapoh ka KHADC kila lah ban register ïaki jaka jong ki sha District Council bad kino kino ki Bank ki la lah ban ithuh ïa ka syrnod bala ai da ka District Council lada ki kwah ban shim ram naki bank.

Ka Synjuk ka la pynsngew ruh hakhmat u CEM halor ka jingkam Rangbah Shnong da ki jaitbynriew Garo haka thaiñ Raid Marwet, kumba kala don ruh ka jingujor da ki nongshong shnong ka thaiñ Raid Marwet halor ka jingjied Rangbah Shnong da u Garo ha katei ka thaiñ bad naka liang ka District Council ka dng buddien ruh ïa katei ka kam bad kum ka Synjuk kan sa phah ruh da ka jingthoh halor katei ka bynta, u la bynrap.