Shillong:Shisngi shuwa ba u Bryan Adams un wan rwai ha nongbah Shillong, u Director of School Education and Literacy u Swapnil Tembe, IAS u la pynmih ia ka hukum ha ka 9 tarik u Nohprah 2024 ba baroh ki skul kiba hap hapoh ki jaka Municipal ki dei ban khanglut ha ka 10 tarik u Nohprah 2024 namarba kan don ka jingdheng kali kaba shyrkhei na ka daw ka jingwan rwai jong u Bryan Adams ha madan Polo. Ha kane ka hukum u la thoh ba la pynmih ia kane ka hukum dei lyngba ka jingkyrpad jong u Director of Tourism jong ka sorkar Meghalaya.
Une u dei u bnai uba baroh ki khynnah kiba hapoh ka klas 10 ki la ioh shuti bad kiba dang long skul mynta ki dei sa tang ki khynnah kiba dang pynkhreh ban ia khun ia ka eksamin Matrik bad klas 12 kumjuh ruh ki khynnah Klas 11. Katkum ka jingtip ba la ioh lum la iathuh ba ki don kumba lai ne saw tylli ki skul kiba la buh sngi ba kin sam Result mynta ka sngi ka 10 tarik u Nohprah hynrei ki hap ban pynsangeh noh namar kane ka jingpynmih hukum ka sorkar kynsan kynsan.
Hadien ba ka sorkar ka la pynmih ia kane ka hukum, u nongthohkhubor u la pyrshang ban ia kren bad katto katne ngut ki nonghikai ki bym kwah ban pynpaw kyrteng ialade namarba ka ia tyngkhuh bad ka tnat pule puthi lane ka tnat Education. Ki la ong ba kane ka jingleh ka sorkar ka ktah bha namarba ki khlem ai por lypa ban pyntip sha ki khynnah hynrei la shu pynmih kynsan kynsan ia ka hukum kaba tang shisngi. Ki la ong ba lada dei ba ai por lypa tang shi taiew ruh kam da ktah than eh hynrei la shu leh syndet syndet.
Ki la ong ruh ba kane ka jingleh ka sorkar ka ktah bha khamtam ia ki khynnah kiba dang pynkhreh ban thoh ia ka eksamin Matrik namar ba kane ka rukom pynmih hukum ban ai shuti kam dei satia kaba tang mynta hynrei ka la jia naduh ka por ba pynlong ia ka Durrand Cup bad ki la ong ba kim tip shuh kaei ka ban dang jia nangne shakhmat namarba ki tamasa lehkmen ka sorkar ki dang bun.
Phi don ban ong eiei?