Kyndit ki riew paidbah, ba khuid ka wah Umkhrah sha Polo

Shillong: Ka la pyn kyndit ia ki nong iaid lynti haba ka la nang khuid biang ka wah umkhrah khamtam ha ki thain Polo. Kane ka jing khuid biang ka wah Umkhrah ka dei hadien ka Shillong Municipal Board (SMB) ryngkat ka jing ia trei lang kato katne ngut ki riew paitbah ki ba lah shim khia ban pynkhuid ia kane ka wah ka ba dap tang da ki niut ki nier.

Ka jing sdang pynkhuid ia ka wah umkhrah da ka Municipal Board ka long hadien ka sorkar Meghalaya ka lah ioh jing iarap pisa na ka Meghalaya Basin Development Authority (MBDA). Ka MBDA ka lah mang haduh 16 lak tyngka na ka bynta ban pynkhuid ia kane ka wah Umkhrah khamtam ha ki thain Polo. Kane ka jing pynkhuid ka long ruh ban khring ia paitbah na ka bynta ka ‘North East Food Show’.

U Myntri ka tnad pynroi sor u bah Hamletson Dohling u lah ong ba ka sorkar ka donbok eh ba ka Meghalaya Basin Development Authority ka lah iarap da ka pisa na ka bynta kane ka projek. U myntri u lah kyntu ruh ia ki Dorbar shnong bad ki paitbah baroh ban ia snoh kti lem bad ka sorkar ban pynkhuid ia ka wah umhrah baroh kawei,
Ka Shillong Municipal Board ka lah ker ruh da ki jing ker nar napdeng ka wah ha thain Demseiniong khang ba ki nuit ki nier kin sah kut shiteng ban suk ia ki nong pynkhuid ban khat ia ki.U bah Hamletson Dohling u lah ong ruh ba ka government shen kan sah sdang da kane ka juh ka buit ban pynkhuid sah ia ka wah Umshyrpi. U lah kyntu ruh ia piadtbah khamtam ki ba sah hajan kane ka wah ba ki dei ban nang ban leh khuid bad ymdei ban bret pathar ia ki niut sha ki wah.